കശ്മീരി പണ്ഡിറ്റിനെ വെടിവച്ചുകൊന്ന ഭീകരനെ വധിച്ചു; ഒരു സൈനികന് വീരമൃത്യു

ശ്രീനഗർ∙ പുൽവാമയിൽ കശ്മീരി പണ്ഡിറ്റിനെ കൊലപ്പെടുത്തിയ ഭീകരനെ സുരക്ഷാസേന വധിച്ചു. ലഷ്കർ ഭീകരൻ അഖിബ് മുസ്താഖ് ഭട്ടാണ് കൊല്ലപ്പെട്ടത്. ഹിസ്ബുൾ മുജാഹിദീൻ സംഘടനയിൽ പ്രവർത്തിച്ചിരുന്ന ഇയാൾ അടുത്തിടെയാണ് ലഷ്കറെ തയ്ബയിൽ ചേർന്നത്. അവന്തിപോരയിൽ നടന്ന ഏറ്റുമുട്ടലിൽ ഒരു സൈനികൻ വീരമൃത്യു വരിച്ചു. മറ്റൊരു സൈനികനു പരുക്കേറ്റു.

അവന്തിപോരയിലെ പദ്‌ഗംപോര മേഖലയിൽ ഭീകരരുടെ സാന്നിധ്യമുണ്ടെന്ന രഹസ്യ വിവരത്തിന്റെ അടിസ്ഥാനത്തിൽ, സൈന്യം ഉൾപ്പെടെയുള്ള സുരക്ഷാ സേനയുടെ സംയുക്ത സംഘം നടത്തിയ പരിശോധനയിലാണ് ഭീകരനെ കണ്ടെത്തിയത്. ഞായറാഴ്ചയാണ് പുൽവാമയിൽ ബാങ്ക് സുരക്ഷാ ജീവനക്കാരനായ സഞ്ജയ് ശർമ (40) കൊല്ലപ്പെട്ടത്.

താമസസ്ഥലമായ അചാനിൽ നിന്ന് ചന്തയിലേക്കു പോകും വഴിയാണ് ഭീകരൻ സഞ്ജയ്ക്കു നേരെ വെടിയുതിർത്തത്. ഇതിനു പിന്നാലെ പ്രദേശത്ത് ശക്തമായ പ്രതിഷേധം അരങ്ങേറി.

English Summary: Kashmiri Pandit Bank Guard's Murder 'Avenged'. Pulwama Terrorist Killed in Encounter