സി.കെ.ജയകൃഷ്ണൻ വാർത്താചിത്ര പുരസ്കാരം ശ്രീലക്ഷ്മി ശിവദാസിന്

കോഴിക്കോട് ∙ മാതൃഭൂമി കൊച്ചി യൂണിറ്റിൽ ചീഫ് ഫൊട്ടോഗ്രാഫർ ആയിരുന്ന സി.കെ.ജയകൃഷ്ണന്റെ ഓർമ‌യ്ക്കായി മാതൃഭൂമിയിലെ ഫോട്ടോ ജേണലിസ്റ്റുകൾ ഏർപ്പെടുത്തിയ വാർത്താചിത്രത്തിനുള്ള അവാർഡ് മലയാള മനോരമ തിരുവനന്തപുരം യൂണിറ്റിലെ ഫൊട്ടോഗ്രാഫർ ശ്രീലക്ഷ്മി ശിവദാസിന്.

തിരുവനന്തപുരത്ത് നവകേരള സദസ്സിനായി മുഖ്യമന്ത്രി പിണറായി വിജയനും മന്ത്രിമാരും സഞ്ചരിച്ച ബസിനു നേരെ കരിങ്കൊടി കാണിച്ച കോൺഗ്രസ് പ്രവർത്തകരിൽ ഒരാളുടെ കാലിലേക്ക് പൊലീസ് വാഹനം ഇടിച്ചു കയറുന്ന ചിത്രത്തിനാണ് പുരസ്കാരം. 10,000 രൂപയും ഫലകവുമടങ്ങുന്ന പുരസ്കാരം കോഴിക്കോട്ട് നടക്കുന്ന ചടങ്ങിൽ സമ്മാനിക്കും. കൊടുങ്ങല്ലൂർ സ്വദേശിനിയാണ് ശ്രീലക്ഷ്മി.