‘കണ്ണൂർ കാടത്തത്തിന്റെ പ്രഭവകേന്ദ്രം, സിപിഎം ഭീകരപ്രവര്ത്തനത്തെ താലോലിക്കുന്നു’
![k-sudhakaran-2 കെ. സുധാകരൻ. (ചിത്രം: മനോരമ)](https://img-mm.manoramaonline.com/content/dam/mm/mo/premium/opinion-and-analysis/images/2023/10/10/k-sudhakaran-2.jpg?w=1120&h=583)
Mail This Article
തിരുവനന്തപുരം∙ ബോംബ് നിര്മാണത്തിനിടയില് കൊല്ലപ്പെട്ടവർക്കുവേണ്ടി രക്തസാക്ഷി സ്മാരക മന്ദിരം പണിത സിപിഎം കേരളീയ സമൂഹത്തിന് എന്തു സന്ദേശമാണു നൽകുന്നതെന്ന് കെപിസിസി പ്രസിഡന്റ് കെ. സുധാകരന്. സ്മാരക മന്ദിരം ഉദ്ഘാടനം ചെയ്യുന്നത് സിപിഎം സംസ്ഥാന സെക്രട്ടറിയാണെന്നത് ഭീകരപ്രവര്ത്തനത്തെ സിപിഎം എന്തുമാത്രം താലോലിക്കുന്നു എന്നതിനു തെളിവാണെന്നും അദ്ദേഹം പറഞ്ഞു.
‘‘2015ല് പാനൂര് ചെറ്റക്കണ്ടിയില് ബോംബ് നിര്മാണത്തിനിടയില് ഉണ്ടായ സ്ഫോടനത്തിൽ മരിച്ച രണ്ടുപേരെ അന്ന് പാര്ട്ടി തളളിപ്പറഞ്ഞെങ്കിലും 2016 മുതല് ഇരുവരുടെയും രക്തസാക്ഷിത്വ ദിനം ആചരിച്ചിരുന്നു. ഇതിനു പിന്നാലെയാണ് സ്മാരകം നിര്മിച്ചത്. ലോക്സഭാ തിരഞ്ഞെടുപ്പിനോട് അനുബന്ധിച്ചു കഴിഞ്ഞമാസം പാനൂര് മുളിയാതോട്ടിൽ ബോംബ് നിര്മാണത്തിനിടയില് സിപിഎം പ്രവര്ത്തകന് കൊല്ലപ്പെട്ടിരുന്നു. വടകരയില് ഷാഫി പറമ്പില് ജയിക്കുമെന്ന് ഉറപ്പിച്ചപ്പോഴാണ് സിപിഎം ബോംബ് തയാറാക്കിയത്. മുളിയാതോട്ടിൽ ബോംബ് സ്ഫോടനം ഉണ്ടായപ്പോഴും സിപിഎം ആദ്യം തള്ളിപ്പറഞ്ഞിരുന്നു. വൈകാതെ ഇവിടെയും സ്മാരക മന്ദിരം ഉയരും’’ – സുധാകരന് പറഞ്ഞു.
ടി.പി. ചന്ദ്രശേഖരന്, ഷുഹൈബ്, ശരത് ലാല്, കൃപേഷ്, അരിയില് ഷുക്കൂര് തുടങ്ങിയ ഒട്ടേറെപ്പേരെ സിപിഎം ബോംബുകള് ഇല്ലാതാക്കി. സിപിഎമ്മിന്റെ കൊലപാതക രാഷ്ട്രീയത്തിനെതിരേ സന്ധിയില്ലാ സമരം ചെയ്ത താൻ എത്രയോവട്ടം സിപിഎമ്മിന്റെ ബോംബ് ആക്രമണത്തിൽനിന്ന് തലനാരിഴയ്ക്ക് രക്ഷപ്പെട്ടു. കേരളം പോലൊരു പരിഷ്കൃതസമൂഹത്തിലാണ് സിപിഎം എന്ന ഫാസിസ്റ്റ് സംഘടനയുടെ കാടത്തത്തിന്റെ തേര്വാഴ്ച. കണ്ണൂരാണ് ഈ കാടത്തത്തിന്റെ പ്രഭവകേന്ദ്രം. രണ്ടു മൂന്നു ദശാബ്ദമായി പിണറായി വിജയനാണ് ഇതിനു നേതൃത്വം നല്കുന്നത്. ഭരണത്തണലില് കേരളം മുഴുവന് വ്യാപിപ്പിക്കാനാണ് ഇവര് ശ്രമിച്ചുവരുന്നതെന്നും സുധാകരൻ ആരോപിച്ചു.