പാലക്കാട് ഒഴുക്കിൽപ്പെട്ടു കാണാതായ 2 പേരുടെ മൃതദേഹം കണ്ടെത്തി; മരിച്ചവരിൽ പൊലീസുകാരനും

പാലക്കാട്∙ അട്ടപ്പാടി പുതൂർ വരഗാർ പുഴയിൽ ഒഴുക്കിൽപ്പെട്ടു കാണാതായ പൊലീസുകാരൻ ഉൾപ്പടെ 2 പേരുടെ മൃതദേഹം കണ്ടെത്തി. ഇടവാണി പ്രാക്തന ഗോത്ര ഊരിലെ സി.മുരുകൻ, സുഹൃത്ത് കൃഷ്ണൻ എന്നിവരെ 16 മുതൽ കാണാതായിരുന്നു. എടവാണിയിൽ നിന്നും ഭൂതയാർ ഊരിലേക്കു പോകുന്നതിനിടെ പുഴ ഇറങ്ങിക്കടക്കാനുള്ള ശ്രമത്തിൽ ഒഴുക്കിൽ പെട്ടതായിരിക്കുമെന്നു കരുതുന്നു. 

നാലു ദിവസമായി ഇരുവരെയും കാണാത്തതിനെ തുടർന്നു ബന്ധുക്കൾ ഇന്നലെ രാവിലെ പുതൂർ പൊലീസിൽ പരാതി നൽകുകയായിരുന്നു. തുടർന്നു നടത്തിയ തിരച്ചിലിൽ ഊരിൽ നിന്നും 3 കിലോമീറ്റർ ദൂരെ ചെമ്പവട്ടക്കാട് പുഴയിൽ മരത്തിലും പാറയിലും തങ്ങിയ നിലയിൽ മൃതദേഹങ്ങൾ കണ്ടെത്തി. മുട്ടിക്കുളങ്ങര ക്യാംപിലെ പൊലീസുകാരനായ മുരുകൻ അഗളി സ്റ്റേഷനിലാണ് ജോലി ചെയ്യുന്നത്.