‘പിണറായിയുടെ അടിമകളായി തുടരണോയെന്ന് സിപി‌ഐ ആലോചിക്കണം; അൻവറിനെ മുഖ്യമന്ത്രിക്കു ഭയം’

കണ്ണൂർ∙ തെറ്റ് തിരുത്തി വന്നാല്‍ സിപിഐയെ സ്വീകരിക്കുന്നത് ആലോചിക്കുമെന്ന് കെപിസിസി അധ്യക്ഷൻ കെ. സുധാകരൻ‌. ‘‘പിണറായി വിജയന്റെ അടിമകളായി എല്‍ഡിഎഫില്‍ തുടരണോയെന്ന് സിപിഐ ആലോചിക്കണം. സിപിഐക്ക് എന്തുകൊണ്ട് സ്വതന്ത്രമായി നിന്നുകൂടാ ? സിപിഐ തെറ്റ് തിരുത്തിയാൽ യുഡിഎഫിൽ എടുക്കുന്ന കാര്യം ചർച്ച ചെയ്യും’’ – സുധാകരൻ പറഞ്ഞു.

പി.വി.അൻവർ കോൺഗ്രസ് എംഎൽഎ ആയിരുന്നെങ്കിൽ താൻ പുറത്താക്കിയേനെ എന്നും സുധാകരൻ പ്രതികരിച്ചു.  അന്‍വര്‍ മുഖ്യമന്ത്രിയെ ഭീഷണിപ്പെടുത്തുകയാണ്. അൻവറിനെതിരെ നടപടിയെടുക്കാത്തത് മുഖ്യമന്ത്രിക്ക് ഭയമുള്ളതിനാലാണ്. മുഖ്യമന്ത്രി പിണറായി വിജയന് രണ്ട് മുഖമുണ്ട്. ഒന്ന് ഭരണപക്ഷ മുഖവും മറ്റൊന്ന് പ്രതിപക്ഷ മുഖവുമാണ്. എല്ലാം ഒളിപ്പിക്കാന്‍ മുഖ്യമന്ത്രി തന്നെ ഇറങ്ങി തിരിച്ചിരിക്കുകയാണെന്നും സുധാകരൻ‌ പറഞ്ഞു.