Farewell Arjun

കർണാടകയ്ക്കും സിദ്ധരാമയ്യയ്ക്കും നന്ദി പറഞ്ഞ് മുഖ്യമന്ത്രി; അർജുന്റെ ഡിഎൻഎ പരിശോധന വ്യാഴാഴ്ച

കോട്ടയം ∙ മണ്ണിടിച്ചിലിൽ കാണാതായ കോഴിക്കോട് കണ്ണാടിക്കൽ സ്വദേശി അർജുന്റെ ലോറി കണ്ടെത്തിയതിൽ കർണാടക സർക്കാരിനും മുഖ്യമന്ത്രി സിദ്ധരാമയ്യയ്ക്കും നന്ദി അറിയിച്ച് മുഖ്യമന്ത്രി പിണറായി വിജയൻ. കാർവാർ എംഎൽഎ സതീഷ് കൃഷ്ണ സെയിലിനും ഉത്തര കന്നഡ ജില്ലാ ഭരണസംവിധാനത്തിനും മുഖ്യമന്ത്രി നന്ദി രേഖപ്പെടുത്തി. അർജുൻ ഓടിച്ചിരുന്ന ട്രക്ക് 72–ാം ദിവസമായ ബുധനാഴ്ച ഉച്ചയ്ക്കു മൂന്നുമണിയോടെയാണു കണ്ടെത്തിയത്. ലോറിയുടെ ക്യാബിനുള്ളിൽനിന്ന് മൃതദേഹവും ലഭിച്ചു. കേരളം മുഴുവൻ പ്രാർഥനയോടെ കാത്തിരുന്ന രക്ഷാദൗത്യം കണ്ണീരോടെയാണ് അവസാനിച്ചത്. ഗംഗാവലിപ്പുഴയിൽ ഡ്രജർ ഉപയോഗിച്ച് നടത്തിയ തിരച്ചിലിലാണ് അർജുന്റെ ലോറി കണ്ടെത്തിയത്. നാവികസേനയുടെ രേഖാചിത്രം ട്രക്ക് കണ്ടെടുക്കുന്നതിൽ നിർണായകമായി. ക്രെയിൻ ഉപയോഗിച്ച് ക്യാബിൻ ഉയർത്തി മൃതദേഹാവശിഷ്ടങ്ങൾ ആദ്യം പുറത്തെടുത്തു. തുടർന്ന് ലോറി കരയിലേക്ക് കയറ്റി. മൃതദേഹം കാർവാർ മെഡിക്കൽ കോളജ് ആശുപത്രിയുടെ മോർച്ചറിയിലാണ്. വ്യാഴാഴ്ച ഡിഎൻഎ പരിശോധനയ്ക്കു സാംപിൾ ശേഖരിക്കും. രണ്ടുദിവസത്തിനുള്ളിൽ നടപടികൾ പൂർത്തിയാക്കി മൃതദേഹം കുടുംബത്തിനു വിട്ടുനൽകും. 

അഞ്ചുദിവസമായി ഡ്രജർ ഉപയോഗിച്ച് ഗംഗാവലിപ്പുഴയിൽ തിരച്ചിൽ നടക്കുകയായിരുന്നു. ജൂലൈ പതിനാറിനാണ് മണ്ണിടിച്ചിലിനെ തുടർന്ന് അർജുനെ കാണാതായത്. ‘‘അർജുന് എന്റെ മുകളിൽ വിശ്വാസം ഉണ്ടായിരുന്നു. എന്തുപറ്റിയാലും ഞാൻ ഉണ്ടെന്ന്. ഞാൻ അവന്റെ കുടുംബത്തോടുള്ള വാക്ക് പാലിച്ചിരിക്കുകയാണ്’’– ലോറി ഉടമ മനാഫ് പറഞ്ഞു. എല്ലാവർക്കുമുള്ള ഉത്തരം ഇതോടെ ലഭിച്ചെന്ന് അർജുന്റെ സഹോദരി ഭർത്താവ് ജിതിൻ പ്രതികരിച്ചു. ‘‘തിരച്ചിലാരംഭിച്ച ആദ്യനാൾ തൊട്ട് അർജുനെ രക്ഷപ്പെടുത്താനാകുമെന്ന ഉറച്ച പ്രതീക്ഷയിലായിരുന്നു നമ്മുടെ നാട്. ഇതോടനുബന്ധിച്ചു വരുന്ന വാർത്തകളെ പ്രതീക്ഷയോടെ കണ്ട് നാം ഒത്തൊരുമിച്ച് അർജുന്റെ കുടുംബത്തിന് പിന്തുണ നൽകി. ആദ്യദിനം തൊട്ട് അർജുന്റെ ട്രക്ക് ഉടമ മനാഫ് അടക്കമുള്ളവർ സ്ഥലത്ത് ക്യാംപ് ചെയ്തിരിക്കുകയായിരുന്നു. മനാഫ് നടത്തിയ ഇടപെടൽ ഉന്നതമായ മാനവികതയുടെ ഉദാത്തമാതൃക കൂടിയാണ്. തിരച്ചിൽ പ്രവർത്തനങ്ങൾ നടത്തിയ കേന്ദ്ര-സംസ്ഥാന സേനകളോട് കേരളം കടപ്പെട്ടിരിക്കുന്നു’’– മുഖ്യമന്ത്രി പറഞ്ഞു.