അപരൻമാരായി ‘രണ്ട് രാഹുൽ’, സുധീരന്റെ അനുഭവമുണ്ടായില്ല; ജയിച്ചു കയറി രാഹുൽ

പാലക്കാട്∙ അപരൻമാർ സ്ഥാനാർഥികൾക്ക് തലവേദനയാണ്. പാലക്കാട്ടെ യുഡിഎഫ് സ്ഥാനാർഥി രാഹുൽ മാങ്കൂട്ടത്തിലിന് ഇത്തവണ രണ്ട് അപരൻമാരുടെ ശല്യമുണ്ടായി. എന്നാൽ തിരഞ്ഞെടുപ്പിനെ ഇത് ബാധിച്ചില്ല. രാഹുൽ മികച്ച ഭൂരിപക്ഷത്തിൽ വിജയിച്ചു. സ്വതന്ത്രരായി മത്സരിച്ച രാഹുൽ ആർ. നേടിയത് 137 വോട്ട് (12.30ന്). രാഹുൽ മണലാഴി നേടിയത് 120 വോട്ട്.

രാഷ്ട്രീയത്തിലെ അതികായരെ തിരഞ്ഞെടുപ്പിൽ വീഴ്ത്തിയ അപരൻമാരുണ്ട്. ഏറ്റവും വലിയ പ്രഹരം ലഭിച്ചത് കോൺഗ്രസ് നേതാവ് വി.എം.സുധീരനാണ്, 2004ലെ ലോക്സഭാ തിരഞ്ഞെടുപ്പിൽ. സിപിഎം സ്ഥാനാർഥി കെ.എസ്.മനോജും വി.എം.സുധീരനുമായിട്ടായിരുന്നു പ്രധാന മത്സരം. അപ്പോഴാണ് അപരനായി വി.എസ്.സുധീരൻ രംഗത്തെത്തുന്നത്. മത്സരത്തിൽ 1,009 വോട്ടിന്റെ ഭൂരിപക്ഷത്തിൽ മനോജ് വിജയിച്ചു. അപരൻ സ്വന്തമാക്കിയത് 8,282 വോട്ടുകൾ. ഈ റെക്കോർഡ് മറ്റൊരു അപരനും തകർക്കാനായിട്ടില്ല.