നന്മയുടെ പ്രകാശമായി ശബരിമലയിൽ കാർത്തിക ദീപം തെളിഞ്ഞു

ശബരിമല∙ സന്നിധാനത്ത് തന്ത്രിമാരായ കണ്ഠര് രാജീവര്, കണ്ഠര് ബ്രഹ്മദത്തൻ, മേൽശാന്തി എസ്. അരുൺ കുമാർ നമ്പൂതിരി എന്നിവർ ചേർന്നു കിഴക്കേമണ്ഡപത്തിൽ കാർത്തിക ദീപം തെളിയിച്ചു. പതിനെട്ടാംപടിക്ക് ഇരു വശത്തുമുള്ള കമ്പവിളക്ക് തെളിച്ചാണ് ഉദ്ഘാടനം നിർവഹിച്ചത്. ദേവസ്വം ജീവനക്കാരും സ്പെഷൽ ഡ്യൂട്ടിക്കാരും ചേർന്ന് സന്നിധാനമാകെ ദീപം ഒരുക്കി. ദീപാരാധനാവേളയിൽ സന്നിധാനം, മാളികപ്പുറം തുടങ്ങി എല്ലായിടത്തും കർപ്പൂര ദീപങ്ങളും തെളിയിച്ചു. കേന്ദ്ര ദ്രുതകർമ സേനാംഗങ്ങൾ പതിനെട്ടാംപടിക്ക് മുൻ വശം കർപ്പൂരദീപം കൊണ്ട് ഓങ്കാരം തീർത്തതും ശ്രദ്ധേയമായി.