ഗുണ്ട ഷംനാദ് നേപ്പാൾ അതിർത്തിയിൽ അറസ്റ്റിൽ; യുഎപിഎ ഉൾപ്പെടെ 22 കേസുകളിൽ പ്രതി

തിരുവനന്തപുരം ∙ തടിയന്റവിട നസീർ ഉൾപ്പെട്ട തീവ്രവാദ സംഘടനയുമായി അടുത്ത ബന്ധം ഉണ്ടായിരുന്ന കുപ്രസിദ്ധ ഗുണ്ട ഷംനാദിനെ നേപ്പാൾ അതിർത്തിയിൽനിന്ന് അറസ്റ്റ് ചെയ്തു. മലപ്പുറം പെരുമ്പടപ്പ് വെളിയംകോട് സ്വദേശിയായ ഷംനാദ് യുഎപിഎ ഉൾപ്പെടെ 22 കേസുകളിൽ പ്രതിയാണ്. ഉത്തർപ്രദേശ് - നേപ്പാൾ അതിർത്തിയിൽ, സംസ്ഥാന ഭീകരവിരുദ്ധ സേനയുടെ സഹായത്തോടെ തൃശൂർ പൊലീസ് ആണ് പ്രതിയെ പിടികൂടിയത്. 

തൃശൂർ വടക്കേക്കാട് പൊലീസ് സ്റ്റേഷനിൽ റജിസ്റ്റർ ചെയ്ത കേസിലാണ് ഇയാൾ അറസ്റ്റിലായത്. വടക്കേ ഇന്ത്യയിലും നേപ്പാളിലും ഒളിവിൽ കഴിയുകയായിരുന്നു. 2016 ൽ വിജിലൻസ് ഉദ്യോഗസ്ഥർ ചമഞ്ഞ് പെരുമ്പാവൂരിലെ വീട്ടിൽനിന്നു സ്വർണാഭരണങ്ങളും മറ്റും കവർന്ന കേസിലെ പ്രധാന പ്രതിയാണ് നസീർ.

ഈ കേസ് പിന്നീട് ഭീകരവിരുദ്ധ സേന അന്വേഷിച്ച് കുറ്റപത്രം സമർപ്പിച്ചിരുന്നു. ഈ കേസിൽ ജാമ്യത്തിൽ ഇറങ്ങിയ പ്രതി പിന്നീട് വടക്കേക്കാട് സ്റ്റേഷനിലെ കേസിൽ ഉൾപ്പെട്ട് ഒളിവിൽ പോയി. ഒളിവിൽ താമസിക്കാൻ ഇയാളെ സഹായിച്ചവരെക്കുറിച്ച് അന്വേഷണം തുടരുകയാണ്. ഭീകരവിരുദ്ധസേനയ്ക്കു ലഭിച്ച രഹസ്യവിവരത്തിന്റെ അടിസ്ഥാനത്തിലായിരുന്നു അറസ്റ്റ്.