‘എംഎൽഎ മാത്രമല്ല പ്രതിഭ അമ്മയുമാണ്; എക്സൈസിനു തെറ്റുപറ്റിയെന്ന് പാർട്ടിക്ക് അഭിപ്രായമില്ല’

ആലപ്പുഴ ∙ യു.പ്രതിഭ  എംഎൽഎയുടെ മകനെതിരെ എക്സൈസ് കേസെടുത്തത് അന്വേഷിച്ച ശേഷമാണെന്നും എക്സൈസിനു തെറ്റുപറ്റിയെന്ന് പാർട്ടിക്ക് അഭിപ്രായമില്ലെന്നും സിപിഎം ജില്ലാ സെക്രട്ടറി ആർ.നാസർ‌. എക്സൈസിനെതിരെ പ്രതിഭ പറയുന്നത് അവരുടെ അഭിപ്രായമാണ്. എംഎൽഎ മാത്രമല്ല, യു. പ്രതിഭ ഒരു അമ്മയുമാണ്. മകൻ തെറ്റ് ചെയ്തിട്ടില്ലെന്നാണ് അവർ വിശ്വസിക്കുന്നത്. അമ്മ എന്ന നിലയിൽ ഒരു സ്ത്രീയുടെ വികാരമാണ് അവർ പ്രകടിപ്പിച്ചതെന്നും നാസർ പറഞ്ഞു.

കായംകുളത്ത് ഒരാൾ മാത്രമേ പാർട്ടി വിട്ട് പോയിട്ടുള്ളൂവെന്നും നാസർ പറഞ്ഞു. ബിപിൻ സി. ബാബു ജില്ലാ പഞ്ചായത്ത്‌ അംഗത്വം രാജിവയ്ക്കാത്തത് അന്തസ്സ് ഇല്ലാത്തതുകൊണ്ടാണ്. കുട്ടനാട് സീറ്റ് സിപിഎം ഏറ്റെടുക്കും എന്ന കാര്യം അജൻഡയിൽ ഇല്ല. ഇപ്പോഴത് എൻസിപിയുടെ സീറ്റാണ്. അത് പാർട്ടി ഏറ്റെടുക്കുന്നതിനെപ്പറ്റി ആലോചന ഉണ്ടായിട്ടില്ല. ഘടകകക്ഷിയെ ജയിപ്പിക്കേണ്ടത് പാർട്ടിയുടെ കടമയാണ്.

ജി.സുധാകരനു കേരളത്തിൽ വലിയ അംഗീകാരമുണ്ട്. അദ്ദേഹം നല്ലൊരു കമ്യൂണിസ്റ്റാണ്. ആ ജനപിന്തുണയുണ്ട്. 75 വയസ്സ് കഴിഞ്ഞവരെ ഒഴിവാക്കാൻ തീരുമാനിച്ചു. അങ്ങനെയാണ് അദ്ദേഹത്തെ ഒഴിവാക്കിയത്. ഇത്തവണയും 75 കഴിഞ്ഞവരെ ഒഴിവാക്കും. ജി.സുധാകരൻ ജില്ലാ സമ്മേളനത്തിൽ പങ്കെടുക്കും. സെമിനാർ ഉദ്ഘാടനം ചെയ്യുമെന്നും നാസർ പറഞ്ഞു.