വയസ്സ് 91; റൂപ്പർട്ട് മർഡോക്കിന് വിവാഹമോചനം

വാഷിങ്ടൻ ∙ മാധ്യമ ചക്രവർത്തിയും 91 വയസ്സുകാരനുമായ റൂപ്പർട്ട് മർഡോക് നാലാം ഭാര്യയുമായി വേർപിരിയുന്നു. നടിയും മോഡലുമായ ജെറിഹാളും ഫോക്സ് കോർപറേഷൻ ചെയർമാൻ മർഡോക്കും പിരിയുകയാണെന്ന് ന്യൂയോർക്ക് ടൈംസ് റിപ്പോർട്ട് ചെയ്തു. 6 വർഷത്തെ ദാമ്പത്യത്തിനു ശേഷമാണ് വിവാഹമോചനം. 

ഫോക്സ് ന്യൂസ് ചാനലും വാൾസ്ട്രീറ്റ് ജേണലുമുൾപ്പെടെയുള്ള പ്രസിദ്ധീകരണങ്ങളുടെ ഉടമസ്ഥരാണ് മർഡോക്കിന്റെ ഫോക്സ് കോർപറേഷൻ. വിവാഹമോചനം കമ്പനിയുടെ ഉടമസ്ഥതയെയോ ഓഹരി ഘടനയെയോ ബാധിക്കില്ല. 

എയർഹോസ്റ്റസായിരുന്ന പട്രീഷ്യ ബുക്കറാണ് മർഡോക്കിന്റെ ആദ്യ ഭാര്യ.1966 ൽ ഇരുവരും പിരിഞ്ഞു. ഇതിൽ ഒരു മകളുണ്ട്. പിന്നീട് സ്കോട്ടിഷ് പത്രപ്രവർത്തക അന്ന മർഡോക്ക് മാനെ വിവാഹം ചെയ്തു. 1999 ൽ പിരിഞ്ഞു. ഇതിൽ 3 മക്കളുണ്ട്. ബിസിനസ് രംഗത്തുള്ള വെൻഡി ഡാങ്ങാണ് മർഡോക്കിന്റെ മൂന്നാം ഭാര്യ. ഈ ബന്ധം 14 വർഷം നീണ്ടുനിന്നു. 2014 ൽ പിരിഞ്ഞു. ഇതിൽ 2 കുട്ടികൾ.

English Summary: Rupert Murdoch and wife Jerry Hall getting divorce