ഹംഗറി പ്രസിഡന്റ് കാതലിൻ രാജിവച്ചു

ബുഡാപെസ്റ്റ് ∙ ബാലപീഡനക്കേസ് കൂട്ടുപ്രതിക്ക് മാപ്പുനൽകി വിവാദത്തിൽപെട്ട ഹംഗറി പ്രസിഡന്റ് കാതലിൻ നൊവാക് രാജിവച്ചു. ചിൽഡ്രൻസ് ഹോമിലെ ലൈംഗികചൂഷണം മറച്ചുവയ്ക്കാൻ ശ്രമിച്ചതിന് കൂട്ടുപ്രതിയായി ശിക്ഷിക്കപ്പെട്ട സ്ഥാപനത്തിന്റെ ഡപ്യൂട്ടി പ്രസിഡന്റിനു മാപ്പു നൽകിയതു ജനകീയ പ്രക്ഷോഭങ്ങൾക്കും പ്രധാനമന്ത്രി വിക്ടർ ഒർബാനെയും കൂടി ലക്ഷ്യമിട്ടുള്ള വിമർശനത്തിനും ഇടയാക്കിയിരുന്നു. കഴിഞ്ഞ വർഷം ഏപ്രിലിൽ ഫ്രാൻസിസ് മാർപാപ്പയുടെ ഹംഗറി സന്ദർശനത്തിനു മുന്നോടിയായാണ് ഏതാനും തടവുകാർക്കു പ്രസിഡന്റ് പൊതുമാപ്പു നൽകിയത്.