പാപുവ ഗിനിയിൽ മണ്ണിനടിയിലായത് 2000 പേർ

സിഡ്നി ∙ ദക്ഷിണ പസിഫിക് ദ്വീപുരാജ്യമായ പാപുവ ഗിനിയിൽ വെള്ളിയാഴ്ചയുണ്ടായ മണ്ണിടിച്ചിലിൽ രണ്ടായിരത്തിലധികം പേരെ കാണാതായെന്ന് അധികൃതർ അറിയിച്ചു. തിരച്ചിൽ 4 ദിവസം പിന്നിടുമ്പോൾ മണ്ണിനടിയിൽപെട്ടവരെ ജീവനോടെ കണ്ടെത്താമെന്ന പ്രതീക്ഷ മങ്ങി. 670 മൃതദേഹങ്ങൾ കണ്ടെടുത്തതായി യുഎൻ ഏജൻസികൾ അറിയിച്ചു. പാപുവ ഗിനിയിലെ ഏറ്റവും വിദൂരമായ മേഖലയിലെ 6 ഗ്രാമങ്ങളാണു മണ്ണിനടിയിലായത്. പുലർച്ചെ 3 ന് ആയിരുന്നു ദുരന്തം. മണ്ണിടിച്ചിൽ മൂലം ഗ്രാമത്തിലേക്കുള്ള റോഡുകൾ തകർന്നതിനാൽ മണ്ണുനീക്കാനുള്ള ആധുനിക സംവിധാനങ്ങൾ എത്താനും വൈകി. ഓസ്ട്രേലിയൻ സൈന്യം രക്ഷാപ്രവർത്തനത്തിനെത്തി.