അഴിമതിക്കേസ്: ഐഎംഎഫ് മുൻമേധാവിക്ക് 5 വർഷം തടവ്

മഡ്രിഡ് ∙ രാജ്യാന്തര നാണ്യനിധി (ഐഎംഎഫ്) മുൻ മേധാവി റോഡ്രിഗോ റത്തോയെ (75) വിവിധ അഴിമതിക്കേസുകളിൽ മഡ്രിഡ് കോടതി 5 വർഷം തടവിനു ശിക്ഷിച്ചു. നികുതിവെട്ടിപ്പ്, പണത്തട്ടിപ്പ് തുടങ്ങി 11 കേസുകളിൽ ഒരുവർഷം നീണ്ട വിചാരണക്കൊടുവിലാണു ശിക്ഷ.സ്പാനിഷ് ധനകാര്യസ്ഥാപനമായ ബാങ്കിയയുടെ ചെയർമാനായിരുന്ന കാലത്തു ക്രെഡിറ്റ് കാർഡ് ദുരുപയോഗം ചെയ്ത് ആഡംബരച്ചെലവുകൾ നടത്തിയെന്ന കേസിൽ 2017 മുതൽ 2 വർഷം തടവുശിക്ഷ അനുഭവിച്ചിരുന്നു.2004–2007 കാലത്താണ് ഐഎംഎഫ് മേധാവിയായിരുന്നത്. ബാങ്കിയയുടെ ചെയർമാനായിരുന്നത് 2010–12 കാലത്തും. 1996 മുതൽ 2004 വരെ കൺസർവേറ്റീവ് പീപ്പിൾസ് പാർട്ടിയുടെ ഭരണകാലത്ത് സ്പെയിനിൽ ഉപപ്രധാനമന്ത്രിയായിരുന്നു.