കഷ്ടിച്ചു 10 മിനിറ്റ് മാത്രം നീണ്ടുനിന്നൊരു പ്രസംഗം, നാലു മിനിറ്റ് വരുന്നൊരു പാട്ട്. അത്ര തന്നെ. തമിഴ് സിനിമയിലെ നിലവിലെ ഏറ്റവും വലിയ താരം രാഷ്ട്രീയപ്രവേശം വ്യക്തമാക്കിക്കഴിഞ്ഞു. ദളപതി വിജയ് രാഷ്ട്രീയത്തിലിറങ്ങുമോ എന്ന ചോദ്യത്തിന് ഇനി പ്രസക്തിയില്ല. അത് എപ്പോൾ സംഭവിക്കും എന്ന ചോദ്യത്തിനും ജൂൺ 17ലെ ആ പ്രസംഗത്തോടെ ഏറെക്കുറെ ഉത്തരമായിക്കഴിഞ്ഞു. തന്റെ രാഷ്ട്രീയത്തിന്റെ ഉള്ളടക്കത്തെക്കുറിച്ചും വിജയ് സൂചന നൽകിയിട്ടുണ്ട്. ജൂൺ 22ന് 49–ാം പിറന്നാളിന് പുതിയ പടത്തിലെ പാട്ട് പുറത്തിറങ്ങിയതോടെ വിജയ്‌യുടെ രാഷ്ട്രീയ പ്രവേശം സംബന്ധിച്ച് അനൗദ്യോഗിക പ്രഖ്യാപനമായി എന്നുതന്നെ കരുതുന്നവരുമുണ്ട്.