അടുത്ത പന്തിൽ സേവാഗ് ഔട്ട്. ‘സച്ചിൻ എന്തായിരിക്കും സേവാഗിനോടു പറഞ്ഞിരിക്കുക’ എന്ന ചോദ്യം ആ നിമിഷം മുതൽ മനസ്സിനെ അലട്ടുകയായിരുന്നു. പത്രസമ്മേളനം അവസാനിക്കാറായിട്ടും അവസരം കിട്ടാതായപ്പോൾ ഇടയ്ക്കു കയറി ചോദിച്ചു. പക്ഷേ സച്ചിൻ ആ ചോദ്യത്തിനു മറുപടി പറയാതെ എഴുന്നേറ്റു. എനിക്ക് നിരാശ. അത് അൽപനേരം മാത്രം. മേശപ്പുറത്തെ റെക്കോർഡറെടുക്കാൻ പോയപ്പോൾ തോളിലൊരു സ്പർശം. പിന്നിൽ സച്ചിൻ! ‘താങ്കളെന്തോ ചോദിച്ചല്ലോ. ആവർത്തിക്കാമോ?’, ഇതിഹാസം കൈയകലത്തു നിൽക്കുന്നതിന്റെ അന്ധാളിപ്പിനെ മറികടന്ന് ചോദ്യം ആവർത്തിച്ചു.