ഇപ്പോൾ തൃശൂർ നഗരവാസിയാണെങ്കിലും ആദ്യമായി തൃശൂർ നഗരത്തിൽ കാലുകുത്തിയത് 1990 ൽ മഹാരാജാസ് ടെക്നോളജിക്കൽ ഇൻസ്റ്റിറ്റ്യൂട്ടിൽ ഡിപ്ലോമയ്ക്ക് ചേരുമ്പോൾ മാത്രമാണ്. പിതാവിനോടൊപ്പം. 1990 ജൂൺ 21ന്‌. അന്ന് തേക്കില്ലാത്ത തേക്കിൻ കാടും (ആ പേരുദോഷം മാറ്റാനായി 92 ലോ മറ്റോ വനംമന്ത്രി കെ.പി. വിശ്വനാഥൻ നട്ടുദ്ഘാടിച്ച കുറച്ച് തേക്കുകളാണ് ഒരു മൂലയിൽ ഉള്ളത്) വട്ടത്തിലുള്ള കോൺക്രീറ്റ് റോഡും കണ്ട് വാപൊളിച്ചു നിന്നിട്ടുണ്ട്. പത്രങ്ങളിൽ പടം ആയി മാത്രം കണ്ടിട്ടുള്ള വടക്കുനാഥന്റെ തെക്കേ നടയും. ആ ദിവസംതന്നെ ഒരു ആറാമിന്ദ്രിയകൽപന പോലെ തോന്നിയിരുന്നു. ഇന്നുമുതൽ ജീവിതം ഈ നഗരത്തിൽ തന്നെ. ഇവിടെനിന്ന് പോയി ഇവിടേക്ക് തിരികെയെത്തുക എന്ന മിനിമം പരിപാടിയായി അന്നു മുതൽ ജീവിതം.