ചിലർ വരുമ്പോൾ ചരിത്രം വഴിമാറുമെന്നാണല്ലോ? നേട്ടങ്ങളുടെ പേരിലും സമൂഹത്തിന് നൽകിയ സന്ദേശങ്ങളുടെ പേരിലുമൊക്കെയാണ് ഏറിയ പങ്ക് ആളുകളും തങ്ങളുടെ പേരുകൾ ചരിത്രത്തിൽ എഴുതിച്ചേർക്കുന്നത്. എന്നാൽ, ഇതിൽനിന്നെല്ലാം തീർത്തും വ്യത്യസ്തരായ ചിലരുണ്ട്. അവരുടെ വരവോടെയാണ് അതുവരെയുള്ള ചരിത്രത്തിന്റെ ദിശമാറി ഒഴുകാൻ തുടങ്ങുന്നത്. നേട്ടങ്ങളുടെ മലവെള്ളപ്പാച്ചിലിനിടയിൽ അവിചാരിതമായി വന്നെത്തുന്ന വീഴ്ചകളിൽ തളർന്നുപോകാതെ, അവയോട് പടപൊരുതി മുന്നേറുന്നവരാണ് ഇക്കൂട്ടർ. ഇത്തരക്കാരുടെ സാന്നിധ്യം ഏറ്റവും കൂടുതലുള്ളത് കായിക രംഗത്തുതന്നെയാണ്. പലതരത്തിലുള്ള പരുക്കുകളുടെ പേരിൽ കരിയർ അവസാനിച്ചു എന്ന് തോന്നുന്നിടത്തുനിന്ന് പതറാതെ പടപൊരുതിക്കയറി വിജയങ്ങളുടെ ജൈത്രയാത്ര തീർക്കുന്ന റിയൽ ഹീറോസ്.