നവ്യ നായര്‍ സാരി ‘വിറ്റത്’ ജീവിക്കാൻ വേണ്ടിയല്ല, ആ പണം എന്തു ചെയ്തു? വലിയ സന്ദേശമാണ് ‘ത്രിഫ്റ്റിങ്’

‘‘ധരിച്ച വസ്ത്രങ്ങൾ മറ്റൊരാൾക്ക് വിറ്റ് കാശാക്കുന്നതിൽ നാണമില്ലേ? പാവങ്ങൾക്ക് ദാനമായി നൽകിക്കൂടേ...’’– നടി നവ്യ നായർ താൻ ഒറ്റതവണ ഉപയോഗിച്ച സാരികളുടെ വിൽപന ഇൻസ്റ്റഗ്രാം വഴി തുടങ്ങിയതിനു പിന്നാലെ വന്ന കമന്റുകളിൽ ഒന്നാണിത്. നെഗറ്റിവ് കമന്റ്സ് അതിന്റെ ഒരു ഭാഗം മാത്രം. എന്നാൽ ഏറിയ പങ്കും നവ്യയെ അനുകൂലിക്കുന്നവരായിരുന്നു. കാരണം, അവർക്കറിയാം ഇത് ആർക്കും മാതൃകയാക്കാവുന്ന ഒരു നല്ല ‘ട്രെൻഡാ’ണെന്ന്. ‘ത്രിഫ്റ്റ് കൾചർ’ എന്നറിയപ്പെടുന്ന ഈ ഫാഷൻ ട്രെൻഡ് മലയാളികള്‍ക്ക് അപരിചിതമായിരിക്കാം. എന്നാല്‍ ഹോളിവുഡിലും ബോളിവുഡിലുമെല്ലാം ഇത് സർവസാധാരണമായിട്ട് വർഷങ്ങളായി. മലയാളി നടിമാരിൽ ആദ്യമായാണ് ഒരാൾ ഈ ത്രിഫ്റ്റ് കൾചർ ട്രെൻഡിലേക്കു കടക്കുന്നത്. എന്നാൽ നവ്യയ്ക്കും മുൻപേ കേരളത്തിൽ പലയിടത്തും ഈ ട്രെൻഡിനു വേണ്ടി നിലകൊണ്ടവരുണ്ടായിട്ടുണ്ട്. എന്താണ് ഈ ത്രിഫ്റ്റ് കൾചർ അഥവാ മിത വിനിയോഗ സംസ്കാരം? ഫാഷൻ വ്യവസായത്തെ കീഴടക്കി മുന്നേറാനിരിക്കുന്ന ഈ പുതിയ പ്രവണതയോട് അഭിനേതാക്കൾക്ക് എന്തുകൊണ്ടാണ് പ്രത്യേക താൽപര്യം? സാധാരണക്കാര്‍ക്കും ഇതിന്റെ ഭാഗമാകാൻ സാധിക്കുമോ? ഇതെങ്ങനെ ഒരു വരുമാന മാർഗമാക്കാം? എല്ലാം വിശദമായറിയാം.