‘എന്റെ അച്ഛനെ ജീവിപ്പിക്കാമോ’: അന്ന് ആ കുഞ്ഞുമോൾ ചോദിച്ചപ്പോൾ ഗുരുവും കരയുകയായിരുന്നു; നൂറിലും നിത്യം ഗുരുസ്നേഹം

‘നമസ്കാരം. ഞാൻ നിത്യചൈതന്യയതി...’ എഴുത്തുകാരൻ സി.രാധാകൃഷ്ണന്റെ വീട്ടിലേക്ക് അറിയിപ്പൊന്നും കൂടാതെ ഗുരു വരികയാണ്. ആ പരിചയപ്പെടുത്തലിനെ ചിരിച്ചുതൊഴുതു, എഴുത്തുകാരൻ. ‘എഴുതുന്ന സയൻസൊക്കെ വായിക്കാറുണ്ട്. എനിക്ക് അതിലൊക്കെ താൽപര്യമുണ്ട്. നമ്മുടെ ആളുകൾ അദ്വൈതം മാത്രമേയുള്ളൂവെന്ന് പറയുന്നു. വേറൊരു കൂട്ടർ ശാസ്ത്രം മാത്രമേയുള്ളൂവെന്നും. ഇതു രണ്ടും ശരിയല്ലെന്ന് നാം ഇരുവരും പറയുന്നുണ്ട്. ഇതിലൊരു പൊരുത്തമുണ്ട്. അതു നമുക്കു കുഴിച്ചുനോക്കാം. കൂടുതൽ വെള്ളം കിട്ടുമോയെന്ന് അറിയാമല്ലോ. ഭൗതികം വിട്ടു നമുക്കു ജീവിക്കാനാവില്ലല്ലോ. ഇതിനെ എവിടെവച്ചാണു നാം കൂട്ടിച്ചേർക്കേണ്ടത്...? ഗുരു ആ സംഭാഷണം തുടർന്നു. 1981ൽ ഗുരുനിത്യയെ ആദ്യമായി കണ്ട അനുഭവം പറയുകയായിരുന്നു സി.രാധാകൃഷ്ണൻ.