കൊച്ചി നഗരത്തിന്റെ മാലിന്യ സംസ്കരണ ശാലയായ ബ്രഹ്മപുരത്തുള്ളത് മാലിന്യമലയാണോ? കംപ്ട്രോളർ ആൻഡ് ഓഡിറ്റർ ജനറൽ (സിഎജി) തയാറാക്കിയ റിപ്പോർട്ട് വായിക്കുന്ന ആർക്കും ഒരു സംശയം തോന്നാം. ഇതു മാലിന്യമലയാണോ അതോ അഴിമതി മലയാണോ ? അഴിമതി സമൂഹത്തിലെ മാലിന്യമാണെങ്കിൽ മാലിന്യമല എന്നു പറയുന്നതിൽ തെറ്റില്ലതാനും. അത്രയേറെ അഴിമതികളാണ് നഗര തദ്ദേശ സ്ഥാപനങ്ങളിലെ മാലിന്യ പരിപാലനവുമായി ബന്ധപ്പെട്ട സിഎജി തയാറാക്കിയ റിപ്പോർട്ടിലുള്ളത്. ബ്രഹ്മപുരം സംബന്ധിച്ച സാധാരണക്കാരന്റെ മനസിലുള്ള എല്ലാ ചോദ്യങ്ങൾക്കും സിഎജി ഉത്തരം നൽകുന്നു. ബ്രഹ്മപുരത്തെ മാലിന്യം തള്ളലിന്റെ മറവിൽ വൻതോതിലുള്ള ക്രമക്കേടും അഴിമതികളും നടക്കുന്നുണ്ടെന്നു നേരത്തേ തന്നെ ആരോപണമുണ്ട്. ഈ ആരോപണങ്ങളെ റിപ്പോർട്ട് ശരി വയ്ക്കുന്നു.