ഇരയെ കണ്ടെത്താൻ മിടുക്കി, ആ 'പ്രലോഭന'ത്തിൽ 'തുമ്പിപ്പെണ്ണ്' വീണു, ഒടുവിൽ ഒറ്റിൽ കുടുങ്ങി?

ആരും സഹായിക്കാനില്ലാത്തൊരു പെൺകുട്ടി എന്തെങ്കിലും ജോലി ലഭിക്കുമെന്ന പ്രതീക്ഷയിൽ കൊച്ചി നഗരത്തിൽ ചെന്നിറങ്ങിയാൽ എന്തു സംഭവിക്കും? സ്വന്തം യോഗ്യത വച്ച് അവൾക്ക് എന്തെങ്കിലും ജോലി സമ്പാദിക്കാം. പക്ഷേ, തനിക്ക് ലഭിക്കുന്ന ശമ്പളം എത്രയാണെന്ന് വീട്ടിലുള്ളവരെ അറിയിക്കണം. ഇല്ലെങ്കിൽ സംഗതി കുഴയും. ചിലപ്പോൾ ഈ നഗരത്തിൽ താമസിക്കുന്നതിനും ഭക്ഷണത്തിനുമുള്ള തുകതന്നെ ശമ്പളംകൊണ്ടു മതിയാകാതെ വരും. വീട്ടിലേക്കു മാസം പണം അയയ്ക്കേണ്ട സ്ഥിതി കൂടിയുണ്ടെങ്കിൽ കുഴയും. കിട്ടിയ ജോലിയിൽനിന്നുള്ള വരുമാനം തികയാതെ വന്നാൽ പെൺകുട്ടികളെ വഴി തെറ്റിക്കാൻ സംഘങ്ങൾ മെട്രോ നഗരത്തിൽ കാത്തു നിൽപുണ്ട്. അവർ പ്രലോഭനങ്ങളുമായി എത്തും. ഏതെങ്കിലും നിമിഷത്തിൽ ഒന്നു കാലിടറിയാൽ കഥ കഴിഞ്ഞു. തിരികെ ജീവിതത്തിലേക്കു നടക്കുക പ്രയാസം. അത്തരത്തിൽ പെട്ടുപോയൊരു പെൺകുട്ടിയാണു സൂസിമോൾ. കഴിഞ്ഞ ദിവസം രാസലഹരിയുമായി കൊച്ചി നഗരത്തിൽ നിന്നു പിടിയിലായ ‘തുമ്പിപ്പെണ്ണ്’ സംഘത്തിലെ കോട്ടയം സ്വദേശിനി സൂസിമോൾ കരകയറാൻ കഴിയാത്ത ചതിക്കുഴികളിലേക്കാണ് ആണ്ടു പോയത്. തിരിഞ്ഞു നടക്കാമായിരുന്നെങ്കിലും അവൾ അതിനു ശ്രമിച്ചില്ല.