2050ൽ ഇന്ത്യയുടെ ഭരണം പിടിക്കും: ഉണ്ണിമായയുടെ മൊഴി; ഉത്തരേന്ത്യൻ സംഘം കേരളത്തിൽ വന്നതെന്തിന്?

തണ്ടർബോൾട്ടുമായി തുടര്‍ച്ചയായുണ്ടാകുന്ന ഏറ്റുമുട്ടലുകളിൽ വലിയ പ്രതിസന്ധിയിലായിരിക്കുകയാണു കേരളത്തിലെ മാവോയിസ്റ്റ് ഗറിലാ സേന. വലിയ നേതാക്കളുൾപ്പെടെ എട്ടു കേഡർമാരെയാണ് കഴിഞ്ഞ 7 വർഷത്തിനിടെ കേരളത്തിൽ സിപിഐക്ക് (മാവോയിസ്റ്റ്) നഷ്ടപ്പെട്ടത്. പശ്ചിമഘട്ട സോണൽ കമ്മിറ്റി സെക്രട്ടറി ബി.ജി. കൃഷ്ണമൂർത്തി ഉൾപ്പെടെയുള്ള നേതാക്കളെ പൊലീസ് അറസ്റ്റ് ചെയ്തു. നാലു മാവോയിസ്റ്റുകളെ കൊലപ്പെടുത്തിയ മഞ്ചിക്കണ്ടി വെടിവയ്പിനു പ്രതികാരം ചെയ്യാൻ രൂപീകരിച്ച ‘വരാഹിണി’ ദളം പിരിച്ചുവിടേണ്ടിവന്നു. വയനാട്ടിൽ ഏറെ സജീവമായിരുന്ന ബാണാസുര ദളത്തിന്റെ കമാൻഡറായ ചന്ദ്രു മറ്റൊരു നേതാവ് ഉണ്ണിമായയ്ക്കൊപ്പം പേരിയ ചപ്പാരം ഊരിൽനിന്നു പിടിയിലായത് നവംബർ ആദ്യവാരം. ഇപ്പോഴിതാ കണ്ണൂർ ഉരുപ്പുംകുറ്റി പാറക്കപ്പാറയിലും മാവോയിസ്റ്റ് സംഘത്തിനു നേരെ വെടിവയ്പുണ്ടായിരിക്കുന്നു. ചപ്പാരം ഊരിൽ‍നിന്നു മാവോയിസ്റ്റുകൾ കണ്ണൂരിലേക്കു കടന്നതായി പൊലീസിനു നേരത്തേ വിവരം ലഭിച്ചിരുന്നു. കഴിഞ്ഞ ഒരു പതിറ്റാണ്ടിലേറെയായി കേരളത്തിൽ സജീവസാന്നിധ്യമായ മാവോയിസ്റ്റുകൾ നേരിടുന്ന ഏറ്റവും വലിയ പ്രതിസന്ധിയാണ് ഇപ്പോഴത്തേത്.