ലൈസൻസിന് ഇനി 'എച്ചും' 'എട്ടും' മാത്രം പോര, പത്താംക്ലാസ് പരീക്ഷ പോലെ കഠിനം, മാറ്റത്തിന്റെ ആദ്യ ഗിയറിട്ട് മോട്ടർ വാഹന വകുപ്പ്

ഏതെങ്കിലും ഡ്രൈവിങ് സ്കൂളിൽ പോയി വളയം പിടിക്കാൻ പഠിച്ച് ‘ഠപ്പേ’ന്നു ലൈസൻസ് എടുക്കാമെന്നു കരുതുന്നവർക്കു മുട്ടൻ പണി വരുന്നു. ‘എച്ച്’ എടുക്കലും ‘എട്ട്’ എടുക്കലും എല്ലാം പഴങ്കഥയാകും. അപകടമില്ലാതെ വണ്ടി ഓടിക്കാനും ഗതാഗത നിയമങ്ങളെല്ലാം കാണാപ്പാഠവും പഠിപ്പിച്ച ശേഷമേ ഇനി ലൈസൻസുള്ളു. ഡ്രൈവിങ് ലൈസൻസ് എടുക്കുന്നവർ വണ്ടി ഉള്ളംകൈയ്യിൽ അറിയുന്നതിനുള്ള കോഴ്സ് പാസായാൽ മാത്രമേ ഇനി ലൈസൻസുള്ളുവെന്നു ചുരുക്കം. ഇന്ത്യയിലെ പല സംസ്ഥാനങ്ങളിലും നടപ്പാക്കി വിജയിച്ച ഡ്രൈവിങ് ടെസ്റ്റ് രീതിയിലേക്കു കേരളവും കടക്കുകയാണ്. അതിന്റെ ആദ്യപടിയായി മോട്ടർ വാഹന വകുപ്പ് ഓരോ ഓഫിസ് പരിധിയിലും ഡ്രൈവിങ് ടെസ്റ്റ് നടത്തുന്നതിന്റെ എണ്ണം കുറയ്ക്കാൻ തീരുമാനിച്ചിട്ടുണ്ട്.