80 ശതമാനവും വനിതകൾ, രാജ്യതലസ്ഥാനത്തെ അഭിമാന പരേഡിൽ തിളങ്ങി നാരിശക്തി, തുടക്കം ശംഖനാദത്തോടെ

രാജ്യത്തിന്റെ എല്ലാ ദിക്കിലുമുള്ള വൈവിധ്യങ്ങളിൽ നിന്നും ഓരോ തുള്ളി ഒഴുകിയെത്തി ജനുവരി 26ന് കർത്തവ്യപഥിലൂടെ ഒരു കടലായൊഴുകും. 75–ാം റിപ്പബ്ലിക് ദിന ആഘോഷത്തിനുള്ള തയാറെടുപ്പുകൾ അവസാന ഘട്ടത്തിലാണ്. പരേഡിന്റെ ഫുൾ ഡ്രസ് റിഹേഴ്സൽ ചൊവ്വാഴ്ച കഴിഞ്ഞു. സംസ്കാരിക വൈവിധ്യവും സൈനിക കരുത്തും ദൃശ്യമാകുന്ന പരേഡിൽ ഇത്തവണ രാജ്യത്തിന്റെ നാരിശക്തിയാണു പ്രതിഫലിക്കുന്നത്. വിവിധ സേനാ വിഭാഗങ്ങളുടെ ഉൾപ്പെടെ പരേഡിൽ പങ്കെടുക്കുന്നവരിൽ 80 ശതമാനവും വനിതകളാണ്. വിവിധ സൈനിക, അർധ സൈനിക വിഭാഗങ്ങളുടെ പരേഡ് നയിക്കുന്നതും വനിത ഓഫിസർമാരാണ്. നായികാ നിരയിൽ ഒട്ടേറെ മലയാളി വനിതകളും ഉണ്ടെന്നതാണ് ഇത്തവണ കേരളത്തിന്റെ അഭിമാനം.