സ്മൃതിയെന്ന കൊടുങ്കാറ്റ്, കിശോരിയെന്ന ഇളംകാറ്റ്; രാഹുൽ ഇല്ലെങ്കിലും പോരാട്ടച്ചൂട് കുറയാതെ അമേഠി

കോൺഗ്രസിന്റെ കോട്ടയായിരുന്നു അമേഠി. സ്മൃതി ഇറാനിയെന്ന കൊടുങ്കാറ്റിൽ 2019ൽ ആ കോട്ട തകർന്നു; നായകൻ വീണു. സ്മൃതി കൊടുങ്കാറ്റാണെങ്കിൽ കോൺഗ്രസ് ഇക്കുറി എതിരെ നിർത്തിയിരിക്കുന്ന കിശോരിലാൽ ശർമ ഇളംകാറ്റാണ്. ഗാന്ധി കുടുംബത്തിന്റെ എക്കാലത്തെയും വിശ്വസ്തൻ. രണ്ടു പേരുടെയും പ്രചാരണങ്ങളിൽ വ്യത്യാസം വളരെ പ്രകടം. ഹിന്ദുത്വവും വികസനവും കൂട്ടിക്കലർത്തിയും പരിഹാസ ശരങ്ങളെയ്തും ആഞ്ഞടിക്കുകയാണ് കേന്ദ്രമന്ത്രി സ്മൃതി ഇറാനി. വോട്ടർമാരെ ഇളക്കിമറിക്കുന്ന പ്രചാരണം. മറുഭാഗത്ത് സൗമ്യമായൊരു തലോടൽ പോലെയാണ് കെ.എൽ.ശർമയുടെ പ്രചാരണം. കൂട്ടത്തിലൊരാളെന്നു തോന്നിപ്പിക്കാനുള്ള ശ്രമം. രാഹുൽ ഗാന്ധിയില്ലെങ്കിലും മത്സരത്തിന്റെ കടുപ്പം കുറഞ്ഞിട്ടില്ലെന്നാണ് അമേഠിയിലൂടെ സഞ്ചരിക്കുമ്പോൾ തോന്നുക.