ഹരിയാന; ഭരണം മറിക്കുന്ന താപ്പാന; ബിജെപി ഭരണപ്രതിസന്ധി നേരിടുന്ന സംസ്ഥാനം; ഭരണത്തിനൊപ്പം നിൽക്കുന്നയിടം

ഇരുപതു വർഷങ്ങൾക്ക് ശേഷം ‘2004’ ആവർത്തിക്കുമെന്നു സ്വപ്നം കാണുന്ന കോൺഗ്രസിനു ഹരിയാന സുഖമുള്ള ഒരോർമയാണ്. അക്കൊല്ലം തിരഞ്ഞെടുപ്പിനു തൊട്ടു മുൻപാണ് ഓം പ്രകാശ് ചൗട്ടാലയുടെ ഇന്ത്യൻ നാഷനൽ ലോക് ദൾ ബിജെപിയുടെ കൂട്ടുവിട്ടത്. ഇക്കുറി തിരഞ്ഞെടുപ്പിനു തൊട്ടുമുൻപ് സഖ്യം വിട്ടതു അതേ ഓം പ്രകാശ് ചൗട്ടാലയുടെ കൊച്ചുമകൻ ദുഷ്യന്ത് ചൗട്ടാല. പാർട്ടിയിൽ മാത്രമാണ് വ്യത്യാസം. മുത്തച്ഛന്റെ ഐഎൻഎൽഡിയിൽ നിന്ന് 2018 ൽ വേർപെട്ട് രൂപീകരിച്ച ജനനായക് ജനത പാർട്ടിയെന്ന ജെജെപിയുടെ നേതാവാണ് ഇപ്പോൾ ദുഷ്യന്ത്.