പ്രശ്നങ്ങൾ രൂക്ഷമാകും മുൻപ് ഋഷി സുനകിന്റെ ഭാഗ്യപരീക്ഷണം: കലങ്ങി മറിഞ്ഞ് ബ്രിട്ടൻ: കളം മാറുമോ?

പൊതുതിരഞ്ഞെടുപ്പ് ജൂലൈ നാലിനു നടക്കുമെന്നു പ്രധാനമന്ത്രി ഋഷി സുനക് കഴിഞ്ഞദിവസം പ്രഖ്യാപിച്ചതോടെ ബ്രിട്ടനിലെ രാഷ്ട്രീയാന്തരീക്ഷം ഗൗരവപൂർണവും സംഭവബഹുലവുമായി. സുനകിന്റെ കൺസർവേറ്റീവ് പാർട്ടി 14 വർഷത്തെ തുടർഭരണത്തിൽ നിന്ന് ഇക്കുറി പുറത്താകുമെന്നാണ് ഭൂരിഭാഗം അഭിപ്രായ സർവേകളും തിരഞ്ഞെടുപ്പു പ്രവചനങ്ങളും പറയുന്നത്. ബ്രിട്ടിഷ് പ്രധാനമന്ത്രിപദത്തിലെത്തുന്ന ആദ്യ ഏഷ്യക്കാരനും ആദ്യത്തെ ഇന്ത്യൻ വംശജനുമായ ഋഷി സുനകിനു നിലവിൽ സ്ഥിതി ഭദ്രമല്ല. ഭരണത്തിൽ ജനങ്ങൾക്കുള്ള അസംതൃപ്തി അദ്ദേഹത്തെ ഞെരുക്കുന്നുണ്ട്. ഒരുകാലത്ത് ഭരണസ്ഥിരതയ്ക്കു പേരുകേട്ട രാജ്യമായിരുന്നെങ്കിലും കഴിഞ്ഞ അഞ്ചു വർഷത്തിനിടെ മൂന്നു പ്രധാനമന്ത്രിമാരെയാണു ബ്രിട്ടിഷ് ജനതയ്ക്കു കിട്ടിയത്: ബോറിസ് ജോൺസണും ലിസ് ട്രസും പിന്നെ ഋഷി സുനകും.