മത്സ്യത്തൊഴിലാളികൾ ചോദിക്കുന്നു, ‘ആ റിപ്പോർട്ട് പുറത്തു വിടുമോ?’; കേരളം ഇനി മുടക്കേണ്ടത് എത്ര കോടി?

തുറമുഖത്തു ചരക്കുനീക്കത്തിനു ട്രയൽ റൺ ആരംഭിച്ചതോടെ വിഴിഞ്ഞം വികസന പ്രതീക്ഷയിലാണ്. മേഖലയിലെ മത്സ്യത്തൊഴിലാളികൾ ഉന്നയിച്ച പ്രശ്നങ്ങൾക്കു പരിഹാരം വൈകില്ലെന്നു സർക്കാർ ഉറപ്പുനൽകിയിട്ടുണ്ട്. തീരത്തിന്റെ സംരക്ഷണം, തൊഴിൽസുരക്ഷ, കുടിയൊഴിപ്പിക്കപ്പെട്ടവർക്കു വീടുകൾ എന്നീ മൂന്നു പ്രധാന ആവശ്യങ്ങളാണ് മത്സ്യത്തൊഴിലാളികൾക്കുള്ളത്. വീടു നഷ്ടമായവർക്കു പുനർഗേഹം പദ്ധതിയിൽപ്പെടുത്തി വീടുകൾ നൽകുമെന്ന പ്രഖ്യാപനം പൂർത്തീകരിച്ചിട്ടില്ല. സ്വന്തമായി സ്ഥലം ഇല്ലാത്തവർ പദ്ധതിക്കു പുറത്താണ്. ഭൂമിയില്ലാത്തവർക്കു വാടകവീടിനായി 5,500 രൂപ മാസംതോറും പ്രഖ്യാപിച്ചെങ്കിലും തുക അപര്യാപ്തമെന്നാണു വിലയിരുത്തൽ.