ഗൾഫ് പ്രവാസികൾ, സാമ്പത്തിക തകർച്ച...; ഇറാൻ– ഇസ്രയേൽ സംഘർഷം യുദ്ധമായാൽ ഇന്ത്യ എന്തു ചെയ്യും? നീക്കം തുടങ്ങി കേന്ദ്രം

ഇറാൻ–ഇസ്രയേൽ സംഘർഷം പൂർണ യുദ്ധത്തിലേക്ക് നീങ്ങാനുള്ള എല്ലാ സാഹചര്യങ്ങളും നിലനിൽക്കുമ്പോൾ ഡൽഹിയിൽ തയാറാകുന്നത് പ്രവാസികളായ പൗരൻമാരെ സുരക്ഷിതരാക്കുന്നതിനുള്ള പദ്ധതികളാണ്. ലോകരാജ്യങ്ങൾക്കിടയിൽ എവിടെ സംഘർഷമുണ്ടായാലും ഇന്ത്യയുടെ ഭാഗത്ത് നിന്നുള്ള ആദ്യ നീക്കം സ്വന്തം പൗരൻമാരെ സുരക്ഷിതരാക്കുക എന്നതാണ്. എന്നാൽ റഷ്യ–യുക്രെയ്ൻ യുദ്ധത്തിൽ പൗരൻമാരെ കൊണ്ടുവരുന്നതിനൊപ്പം രാജ്യതാൽപര്യങ്ങൾ കൂടി സംരക്ഷിക്കാൻ ഇന്ത്യ ശ്രമിച്ചു. ഇതിലൊന്നായിരുന്നു വിലകുറച്ച് ലഭിക്കുന്ന റഷ്യൻ എണ്ണ. അതുവരെ എണ്ണ ഇറക്കുമതിയുടെ 2 ശതമാനം മാത്രമുണ്ടായിരുന്ന റഷ്യൻ എണ്ണ 38 ശതമാനത്തിലേക്ക് ഉയർത്തി ഇന്ത്യൻ സംഭരണികൾ നിറച്ചിടാൻ ഇന്ത്യയ്ക്കായി. യുദ്ധവേളകളിൽ ദശാബ്ദങ്ങളായി തുടർന്നുവന്ന പൗരൻമാരെ ഒഴിപ്പിക്കലിനപ്പുറം സ്വന്തം താൽപര്യങ്ങൾ കൂടി സംരക്ഷിക്കാനും ഇതിലൂടെ ഇന്ത്യയ്ക്കായി. ഇറാൻ–ഇസ്രയേൽ സംഘർഷം പൂർണ യുദ്ധത്തിലേക്ക് നീങ്ങുമ്പോൾ ഇന്ത്യയുടെ ആശങ്കകൾ വലുതാണ്. ഇരുരാജ്യങ്ങൾക്ക് ഇടയിൽ നിലനിൽക്കുന്ന സംഘർഷം യുദ്ധമായി മാറിയാൽ അത് പശ്ചിമേഷ്യയെ മൊത്തം ബാധിക്കാൻ സാധ്യതയുണ്ട്. ഇന്ത്യയുടെ സമാധാനത്തിനും സാമ്പത്തിക അടിത്തറയ്ക്കും പശ്ചിമേഷ്യ പ്രധാനമാണ്. ഇറാ‌ന്‍– ഇസ്രായേൽ സംഘർഷത്തിൽ ഇന്ത്യയുടെ ആശങ്കകൾ എന്തൊക്കെയാണ്? ഇതിന് മുൻപ് മേഖല സംഘർഷത്തിലായപ്പോൾ ഇന്ത്യയ്ക്ക് എത്രമാത്രം ദോഷകരമായി? വിശദമായി പരിശോധിക്കാം.