ഇനിയും ‘മാജിക്’; സഹോദരനോട് ‘മത്സരം’ തുടരാൻ പ്രിയങ്ക; രാഹുലിന്റെ ‘വയനാടൻ ശൈലി’യിൽനിന്ന് മാറും?

എത്രയാകണം പ്രിയങ്കയുടെ ഭൂരിപക്ഷം? അതൊരു മാജിക് നമ്പർ ആകണം. അല്ലെങ്കിൽ ഇതുവരെ മണ്ഡലം കാണാത്തത്ര മികച്ച ഭൂരിപക്ഷം നേടുക. ജയത്തിനുപരിയായി ഈയൊരൊറ്റ ലക്ഷ്യത്തിനായാണ് വയനാട് മണ്ഡലത്തിൽ യുഡിഎഫ് പ്രവർത്തിച്ചത്. ഒപ്പം മത്സരിക്കാൻ പല സ്ഥാനാർഥികളുണ്ടായിരുന്നെങ്കിലും പ്രിയങ്ക മത്സരിച്ചത് സ്വന്തം സഹോദരൻ രാഹുൽ ഗാന്ധിയോടാണെന്നതാണ് വാസ്തവം. 2024ൽ രാഹുൽ ഗാന്ധി നേടിയ 3, 64,422 ലക്ഷം എന്ന ഭൂരിപക്ഷത്തോട്. അത് നേടാൻ വേണ്ടിയാണ് മണ്ഡലത്തിലൊന്നാകെ യുഡിഎഫ് പ്രവർത്തകർ ഓടി നടന്നത്. ആ പ്രയത്നമാണ് ഫലം കണ്ടത്. പോളിങ് കുറഞ്ഞെങ്കിലും പ്രതീക്ഷിച്ചതു പോലെ ഒരു മാജിക് നമ്പറിൽ പ്രിയങ്കയുടെ ഭൂരിപക്ഷമെത്തി; 4,10,931 എന്ന മികച്ച ഭൂരിപക്ഷം. പ്രിയങ്കയുടെ ഈ വിജയം യുഡിഎഫ് പ്രവർത്തകരുടെയാകെ വിജയമാണ്. മണ്ഡല ചരിത്രത്തിലെ ഏറ്റവും കുറഞ്ഞ പോളിങ് നടന്നിട്ടും അത് പ്രിയങ്കയുടെ ഭൂരിപക്ഷത്തെ ബാധിച്ചില്ല. തിരഞ്ഞെടുപ്പ് നടന്ന ദിവസം മുതൽ യുഡിഎഫ് പറഞ്ഞതുപോലെ പോൾ ചെയ്യാതെ പോയത് യുഡിഎഫ് വോട്ടുകളല്ല എന്ന് കാണിക്കുന്നതായിരുന്നു തിരഞ്ഞെടുപ്പ് ഫലം. ഈ തിരഞ്ഞെടുപ്പിൽ മണ്ഡലത്തിൽ ഒന്നുമല്ലാതായത് എൽഡിഎഫും ബിജെപിയുമാണ്. കഴിഞ്ഞ വർഷം പോൾ ചെയ്ത വോട്ട് പോലും സ്വന്തം പെട്ടിയിലാക്കാൻ എൽഡിഎഫിനും ബിജെപിക്കുമായില്ല.