ഇങ്ങനെയുള്ള ധോണി ഈ സീസണിൽ ഐപിഎൽ മതിയാക്കുമോ? ജാർഖണ്ഡിൽനിന്നു വന്ന് ചെന്നൈയുടെ തലയായി മാറിയ താരത്തിന് ‘ചെപ്പോക്കിൽ’ ഒരു റോയൽ യാത്രയയപ്പ് ഉണ്ടാകുമോ ? സിഎസ്കെ പ്ലേഓഫ് കണ്ടില്ലെങ്കിൽ മേയ് 14ന് ചെപ്പോക്കിൽ കൊൽക്കത്ത നൈറ്റ് റൈഡേഴ്സുമായിട്ടായിരിക്കും ഒരുപക്ഷേ ക്യാപ്റ്റൻ കൂളിന്റെ അവസാന ഐപിഎൽ മത്സരം.ടീം മാനേജ്മെന്റ് മറക്കാനാകാത്തൊരു യാത്രയയപ്പ് ഒരുക്കാൻ തയാറാണ്, എന്നാൽ ധോണി ഇതുവരെ തന്റെ തീരുമാനം വ്യക്തമാക്കിയിട്ടില്ലെന്നു മാത്രം. ചെപ്പോക്കിൽ ചെന്നൈയുടെ സ്വന്തം കാണികൾക്കു മുന്നിൽ കളിച്ച് മതിയാക്കണമെന്ന് മുൻപ് ധോണി പറഞ്ഞിട്ടുണ്ട്. ഇന്ത്യൻ ടീമിൽനിന്നു വിരമിക്കുമ്പോൾ പോലും ഇല്ലാതിരുന്ന ആഗ്രഹം! ഒരുപക്ഷേ കോവിഡ് ഹോം ഗ്രൗണ്ട് നിഷേധിച്ച രണ്ടു സീസണുകൾക്കു ശേഷവും മഞ്ഞ ജഴ്സിയിൽ ധോണിയെക്കാണുന്നതിന്റെ കാരണവും ഇതാകാം.