ലോക വനിതാ ടെന്നിസ് ചരിത്രത്തിൽ തങ്കലിപികളിലെഴുതേണ്ട പേരാണ് ‘മാർട്ടിന നവരത്‌ലോവ’. 18 സിംഗിൾസ്, 31 വനിതാ ഡബിൾസ്, 10 മിക്സ്ഡ് ഡബിൾസ് അടക്കം 59 ഗ്രാൻഡ് സ്‌ലാം ടൈറ്റിലുകൾ. 332 ആഴ്ച ലോകത്തിലെ ഒന്നാം നമ്പർ വനിതാ ടെന്നിസ് താരം. 1956ൽ ചെക്കോസ്ലോവാക്യയിൽ ജനിച്ച്, പിന്നീട് യൂഎസ് പൗരത്വം സ്വീകരിച്ച മാർട്ടിന, 1974 ൽ 18 ാം വയസ്സിൽ ഫ്രഞ്ച് ഓപ്പൺ മിക്സ്ഡ് ഡബിൾസ് നേടി ഗ്രാൻഡ് സ്‌ലാം യാത്രയ്ക്കു തുടക്കം കുറിച്ചു. 50–ാം വയസ്സിനോടടുത്ത് 2006 ൽ യുഎസ് ഓപ്പൺ മിക്സ്ഡ് ഡബിൾസ് നേടുംവരെ 32 വർഷത്തോളം ആ വിജയഘോഷയാത്ര തുടർന്നു. വിസ്മയകരമായ ജീവിതവിജയത്തിന്റെ ശാശ്വതദൃഷ്ടാന്തം. അവർ ഏർപ്പെട്ട മേഖലയിലെ വൻ നേട്ടങ്ങൾ.