കനപ്പെട്ട പ്രയോജനം പ്രതീക്ഷിക്കാതെ, വെറുതേ എന്തെങ്കിലും ചെയ്യുന്ന രീതി മോദി സർക്കാരിനും ബിജെപിക്കുമില്ല. പുതിയ പാർലമെന്റ് മന്ദിരത്തിലെ ലോക്സഭാ ഹാളിൽ 888 പേർക്കായി ഇരിപ്പിടമുണ്ടാക്കിയത് ഭാവിയിലെ ആവശ്യങ്ങൾ കണക്കിലെടുത്തെന്നാണ് ഒൗദ്യോഗിക വാക്ക്. ഇപ്പോൾ 543 പേരുടേതാണ് ലോക്സഭ. അവിടെ 345 പേർക്കുകൂടി ഇടമുണ്ടാക്കുമ്പോൾ സഭയെ വലുതാക്കാൻ പോകുന്നുവെന്ന് ഊഹിക്കാം; അതിലൂടെ നമ്മുടെ ജനാധിപത്യം കൂടുതൽ വലുതാകുമെന്ന് ആഗ്രഹിക്കാം. എപ്പോഴാണ് ഇതു സംഭവിക്കുകയെന്നു സർക്കാരോ പാർട്ടിയോ പറഞ്ഞിട്ടില്ല.