കേരള മുഖ്യമന്ത്രി പിണറായി വിജയൻ യുഎസ് യാത്രയിലാണ്. ലോക കേരളസഭയടക്കമുള്ള പരിപാടികളിൽ പങ്കെടുക്കാനാണ് അദ്ദേഹത്തിന്റെ യാത്ര. ആഭ്യന്തരമന്ത്രി കൂടിയായ അദ്ദേഹം കേരളത്തിൽ ഇല്ലാത്ത സമയത്തുതന്നെയാണ് പൊലീസിന്റെയും വിജിലൻസിന്റെയും ഭാഗത്തുനിന്ന് സുപ്രധാന നീക്കങ്ങളുണ്ടായിരിക്കുന്നത്. പ്രതിപക്ഷത്തെ രണ്ട് പ്രമുഖ നേതാക്കൾക്കെതിരെ കേസുമായി മുന്നോട്ട് പോകാൻ തീരുമാനിച്ചിരിക്കുന്നു അവർ. ഒരാൾ പ്രതിപക്ഷ നേതാവ് വി.ഡി.സതീശൻ, പിന്നൊരാൾ കെപിസിസി അധ്യക്ഷൻ കെ. സുധാകരനും. 2018ലെ പ്രളയത്തിനുശേഷം പറവൂർ മണ്ഡലത്തിൽ വി.ഡി.സതീശൻ നടപ്പാക്കിയ ‘പുനർജനി’ പുനരധിവാസ പദ്ധതിയുമായി ബന്ധപ്പെട്ട വിദേശയാത്ര, പണപ്പിരിവ്, പണത്തിന്റെ വിനിയോഗം എന്നിവ അന്വേഷിക്കാനാണ് അന്വേഷണ സംഘത്തിന് വിജിലൻസ് ഡയറക്ടർ നൽകിയ നിർദേശം.