സുദീർഘമായ പരിണാമപാതയിലൂടെ ബഹുദൂരം സഞ്ചരിച്ചാണു നാൽക്കാലി വാനരവർഗം ഇരുകാലിയായ നരവർഗമായി ഉരുത്തിരിഞ്ഞത്. നമ്മുടെ ഉറ്റബന്ധുവായ ചിമ്പാൻസിയുമായി നാം 99% ജനിതക ഡിഎൻഎ പങ്കിടുന്നുണ്ടെങ്കിലും അവർ വല്ലപ്പോഴും മാത്രമേ ഇരുകാലിൽ നടക്കുന്നുള്ളൂ. നാമാകട്ടെ പതിവായി, നിത്യശീലമായി ഇരുകാലിൽ നടന്നുകൊണ്ടേയിരിക്കുന്നു. വ്യായാമത്തിന്റെ ഭാഗമായി, ആരോഗ്യപ്രദായിനി മന്ത്രമായി ദിവസേന 10,000 ചുവടുകൾ എന്ന പ്രമാണം ഞാൻ സ്വീകരിച്ചു. ഏതാണ്ട് ഒരു കൊല്ലമായി; വെറുതേ നടന്നാലും അളക്കണം എന്ന നിർബന്ധത്തിൽ ഒരു ഗാലക്സി വാച്ചും കയ്യിൽ കെട്ടി.