‘‘ഞങ്ങൾക്ക് ചെല്ലാനം മോഡൽ ടെട്രാപോഡ് ഭിത്തി വേണം’’– കനത്ത മഴയിൽ കടൽ വീട്ടിലേക്ക് ഇരച്ചു കയറിയപ്പോൾ രക്ഷ തേടി തെരുവിലേക്കിറങ്ങിയ ഒരു കൂട്ടം മനുഷ്യർ പറഞ്ഞ വാക്കുകളാണിത്. വൈപ്പിൻ വെളിയത്താംപറമ്പ് കടപ്പുറം നിവാസികളാണ് കഴിഞ്ഞ ദിവസം വൈപ്പിനിലെ സംസ്ഥാനപാതതന്നെ ഉപരോധിച്ച് രംഗത്തെത്തിയത്. മഴക്കാലമായാൽ ജീവിതം ദുരിതമയമാണ് ഇവർക്ക്. വർഷങ്ങളായി അനുഭവിക്കുന്ന ഈ ദുരിതത്തിൽനിന്ന് രക്ഷ വേണം. ടെട്രാപോഡ് എന്ന ആശയം അവർ മുന്നോട്ടു വയ്ക്കാനും കാരണമുണ്ട്. വെളിയത്താംപറമ്പിൽനിന്ന് കിലോമീറ്ററുകൾ മാറി, കൊച്ചിയിൽത്തന്നെയുള്ള ചെല്ലാനത്ത് ടെട്രാപോഡുകളുടെ വിജയകരമായ വിന്യാസം അവർ കണ്ടതാണ്.