ബില്ലുകളുടെ ‘സ്പീഡ് ഗവർണർ’മാർ

വാഹനങ്ങളുടെ വേഗനിയന്ത്രണത്തിനുള്ള ‘സ്പീഡ് ഗവർണർ’ സംവിധാനത്തെ മലയാളത്തിൽ ‘വേഗപ്പൂട്ട്’ എന്നു വിളിച്ചയാൾ ആ വിളിയിൽ അൽപം രാഷ്ട്രീയവും കലർത്തി എന്നു കരുതേണ്ടതുണ്ട്. നിയമസഭകൾ‍ പാസാക്കുന്ന ബില്ലുകൾ നിയമമാകുന്നതിനുള്ള യാത്രയ്ക്കു വേഗപ്പൂട്ട് ഇടുന്നവരെന്നു ഗവർണർമാരെ നിർവചിക്കാൻ തക്കതാണ് സമീപകാലത്തെ ചില സംഭവവികാസങ്ങൾ; കേരളത്തിൽ മാത്രമല്ല, പഞ്ചാബിലും തമിഴ്നാട്ടിലും തെലങ്കാനയിലും. ഭാഷാപരമായല്ലെങ്കിലും, ഗവർണർ എന്ന പദത്തിനു വേഗപ്പൂട്ട് എന്ന ദുഃസൂചന ചേരുമെന്ന ചിന്തയുടെ പകർപ്പവകാശം ജവാഹർലാൽ നെഹ്റുവിനുള്ളതാണ്.