‘സംസ്ഥാനം തകർച്ചയിൽ, 1600 കോടികൊണ്ട് എന്തു ചെയ്യാൻ! ‌പ്രഖ്യാപനങ്ങളേറെ, പണമുണ്ടോ സർക്കാരിന്റെ കയ്യിൽ?’

കേരളത്തിന്റെ വികസനത്തിനെ മുന്നോട്ടു കൊണ്ടു പോകുവാൻ സ്വകാര്യ സംരംഭകരെ പ്രോത്സാഹിപ്പിക്കുമെന്ന ബജറ്റ് പ്രഖ്യാപനം സ്വാഗതാർഹമാണെന്നു പറയുന്നു ഡോ.ബി.എ.പ്രകാശ്. 1990 കളിൽ ഉദാരവൽക്കരണം നടപ്പിലാക്കിയപ്പോൾ അതിനെതിരെ വലിയ പ്രക്ഷോഭമാണ് സിപിഎം ഉൾപ്പെടെയുള്ള ഇടതുപക്ഷ പാർട്ടികൾ ഉയർത്തിയത്. അത്തരം നിലപാടുകൾ കാലോചിതമായി മാറുന്നുവെന്നത് നല്ല കാര്യമാണ്. കേരളത്തെ ഉന്നത വിദ്യാഭ്യാസത്തിന്റെ ഹബാക്കി മാറ്റാനുള്ള ശ്രമവും നല്ലതാണ്. അതേസമയം, സംസ്ഥാനം ഇതുവരെ കാണാത്ത ധനകാര്യ തകർച്ചയിലാണെന്ന് എല്ലാവർക്കും അറിയാം. ആ സാഹചര്യത്തെ തരണം ചെയ്യാനുള്ള ശക്തമായ നടപടികളാണ് ബജറ്റിൽ ധനമന്ത്രി കെ.എൻ. ബാലഗോപാലിൽനിന്നു പ്രതീക്ഷിച്ചിരുന്നത്. അതിനുള്ള നടപടികളൊന്നും അദ്ദേഹം പ്രഖ്യാപിച്ചില്ലെന്നത് നിരാശപ്പെടുത്തുന്നു.