എല്ലാ കുത്തും നീലയല്ല- ബി.എസ്.വാരിയർ എഴുതുന്നു

ഹാർവഡ് സർവകലാശാലയിലെ ഗവേഷകർ 2018ൽ രസകരമായൊരു പരീക്ഷണം നടത്തി. നിറങ്ങളുടെ നേരിയ വ്യതാസംപോലും തിരിച്ചറിയാൻതക്ക കാഴ്ചശക്തിയുള്ള ഏതാനും പേരെ തിരഞ്ഞെടുത്തു. ഇളംനീല മുതൽ കടുത്ത ഊതനിറം (പർപ്പിൾ) വരെ പല വർണ്ണഭേദങ്ങളിലുള്ള അസംഖ്യം കുത്തുകളിൽനിന്ന് നീലക്കുത്തുകൾ തിരഞ്ഞെടുക്കാൻ ആവശ്യപ്പെട്ടു. നീലയും ഊതയും തുടക്കത്തിൽ തുല്യമായിരുന്നു. തുടർന്ന് നീലക്കുത്തുകളുടെ എണ്ണം കുറച്ചാണ് കംപ്യൂട്ടർ-സ്ക്രീനിൽ ഫ്ലാഷ് ചെയ്തത്. നിറങ്ങളുടെ അനുപാതം മാറ്റുന്നുണ്ടെന്ന് കാണികളെ ഓർമ്മിപ്പിച്ചിരുന്നു. പക്ഷേ, അവർ തുടർന്നും ഉള്ളതിലേറെ നീലക്കുത്തുകളുണ്ടെന്ന് പറഞ്ഞുകൊണ്ടിരുന്നു. ഊതയോട് അടുത്ത കുത്തുകളും അവർക്കു നീലയായിത്തോന്നി. ഈ തോന്നലിന് ‘ബ്ലൂ ഡോട്ട് ഇഫക്ട്’ (നീലബിന്ദുപ്രഭാവം) എന്ന പേരും നൽകി.