മെക്സിക്കോയിൽ വീഴുമോ യുഎസ് ബോംബ്? ക്ലോഡിയയുടെ തീരുമാനം നിർണായകം; കുടിയേറ്റം തടയാൻ ട്രംപിന്റെ ‘ബോർഡർ സാർ’
Mail This Article
നവംബര്‍ ആദ്യവാരം നടന്ന യുഎസ് പ്രസിഡന്റ് തിരഞ്ഞെടുപ്പില്‍ വന്‍ ഭൂരിപക്ഷത്തോടെ വിജയിച്ച ഡൊണള്‍ഡ്‌ ട്രംപിന്റെ തിരിച്ചുവരവിനെ കുറിച്ചുള്ള വാര്‍ത്തകള്‍ മാധ്യമങ്ങളില്‍ ഇപ്പോഴും നിറഞ്ഞു നില്‍ക്കുന്നു. തിരഞ്ഞെടുപിന്‌ മുന്‍പുള്ള പ്രചാരണ സമയത്ത്‌ ട്രംപ്‌ യുഎസ് ജനതയ്ക്ക്‌ നല്‍കിയ ഏതൊക്കെ വാഗ്ദാനങ്ങള്‍ വേഗം നടപ്പാക്കും എന്നതാണ് ലോകമെമ്പാടുമുള്ള ഇപ്പോഴത്തെ ചര്‍ച്ച. തന്റെ കൂടെ പ്രവര്‍ത്തിക്കേണ്ട ഭരണസാരഥികളെ പ്രഖ്യാപിക്കുന്നതിന്റെ തിരക്കിലാണ്‌ ട്രംപ്‌. മുറപ്രകാരമുള്ള അധികാരക്കൈമാറ്റം ഉണ്ടാകുമെന്നു ജോ ബൈഡന്‍ അറിയിച്ച സ്ഥിതിക്ക്‌ 2020ല്‍ ഉണ്ടായ സംഭവങ്ങളുടെ പുനരാവര്‍ത്തനം ഇക്കുറി ഉണ്ടാകില്ലെന്ന് ഉറപ്പിക്കാം. യുഎസ് കേവലം സാമ്പത്തിക സൈനിക മേഖലകളില്‍ ഭൂമിയിലെ ഏറ്റവും ശക്തമായ രാജ്യം മാത്രമല്ല; ലോക രാഷ്ട്രങ്ങളുടെ അനൗപചാരിക നേതാവ്‌ കൂടിയാണ്‌. ലോകത്തിന്റെ കാവലാളായും സ്വന്തന്ത്ര രാജ്യങ്ങളുടെ വക്താവായും യുഎസിന് സ്ഥാനമുണ്ട്‌. ഇന്ന്‌ രാജ്യാന്തര വാണിജ്യ മേഖലയെ നിലനിര്‍ത്തുന്ന കറന്‍സി യുഎസ് ഡോളര്‍ ആണ്‌. ലോകത്തിലെ ചെറുതും വലുതുമായ എല്ലാ രാജ്യങ്ങളും യുഎസുമായുള്ള ബന്ധത്തിന്‌ വലിയ പ്രാധാന്യം നല്‍കുന്നു എന്നതും ഒരു വസ്തുതയാണ്‌. ഇതു കൊണ്ടെല്ലാം ട്രംപിന്റെ രണ്ടാം വരവിന്റെ പ്രത്യാഘാതങ്ങള്‍ എന്തെല്ലാമാണെന്ന്‌ പഠിക്കുന്ന തിരക്കിലാണ്‌ ഒട്ടു മിക്ക രാഷ്ട്രങ്ങളും നയതന്ത്രജ്ഞ സമൂഹവും.
