ഇന്ത്യ അകന്നത് മുതലെടുത്ത് പാക്കിസ്ഥാൻ; വാങ്ങുന്നത് 40,000 റൗണ്ട് വെടിക്കോപ്പ്, ഷെല്ലുകള്‍; ബംഗ്ലദേശിലെത്താൻ മിശ്രി വൈകിയോ?

ബംഗ്ലദേശിലെ ഭരണമാറ്റത്തിന്റെയും തുടർന്നു പൊട്ടിപ്പുറപ്പെട്ട ഇന്ത്യാവിരുദ്ധ വികാരങ്ങളുടെയും പശ്ചാത്തലത്തിൽ ഇരുരാജ്യങ്ങളും തമ്മിലുള്ള ബന്ധം കുറെനാളായി വല്ലാതെ വഷളാകുന്ന സ്ഥിതിയായിരുന്നു. അതിന് ഒരുപരിധിവരെ പരിഹാരം കാണാൻ വിദേശകാര്യ സെക്രട്ടറി വിക്രം മിശ്രിയുടെ ധാക്ക സന്ദർശനത്തിനു സാധിച്ചെന്നാണു നിഗമനം. ഭരണമാറ്റത്തെത്തുടർന്ന്, നാലുമാസമായി ബംഗ്ലദേശ് ഭരണകൂടവുമായി ഉന്നതതലത്തിൽ ഒരു സമ്പർക്കവും നടത്താതിരുന്നതു പ്രശ്നങ്ങൾ കൂടുതൽ വഷളാക്കിയെന്ന വിലയിരുത്തലിന്റെ അടിസ്ഥാനത്തിലായിരുന്നു മിശ്രിയുടെ സന്ദർശനം. ബന്ധത്തിൽ കൂടുതൽ വിള്ളലുണ്ടാകുന്നതു തടയണമെന്ന ബംഗ്ലദേശ് ഭരണകൂടത്തിന്റെ താൽപര്യം മിശ്രിയെ സ്വീകരിക്കാൻ ധാക്ക തയാറായതിൽനിന്നു വ്യക്തം. ചർച്ചകളിൽ ഇരുവിഭാഗവും തങ്ങളുടെ നിലപാടുകൾ വ്യക്തമാക്കി. ന്യൂനപക്ഷങ്ങൾക്കെതിരെ നടന്ന അക്രമം സംബന്ധിച്ച് ഇന്ത്യയിൽ പ്രചരിക്കുന്ന റിപ്പോർട്ടുകൾ അതിശയോക്തിപരമാണെന്ന നിലപാടിലാണ് ബംഗ്ലദേശെന്നാണ് അറിയുന്നത്. പ്രത്യേകിച്ച്, ആൾക്കൂട്ടക്കൊലപാതകവും സ്ത്രീപീഡനവും സംബന്ധിച്ചുള്ളവ. അതേസമയം, ആരാധനാലയങ്ങൾക്കും വ്യാപാരസ്ഥാപനങ്ങൾക്കുമെതിരെ വ്യാപകമായി അക്രമം നടന്നെന്ന കാര്യം