‘അൽ ഖായിദയിലാണ് അവരുടെ വേരുകൾ’; നാലുഭാഗത്തും ശത്രുക്കൾ; കുര്‍ദുകൾക്ക് മുന്നിൽ ഇനി ഭീതിയുടെ ദിനങ്ങൾ

സിറിയയുടെ വടക്കുകിഴക്കൻ മേഖല അറിയപ്പെടുന്നതു റോജാവ എന്നാണ്. ഇതു രണ്ടാം തവണയാണു മാധ്യമ പ്രവർത്തക എന്ന നിലയിൽ ഈ നാടു ഞാൻ സന്ദർശിക്കുന്നത്. കഴിഞ്ഞ 5 വർഷത്തിൽ, 2019 നു ശേഷം റോജാവയുടെ തലസ്ഥാനമായ ഖാമിഷ്‌ലോ വല്ലാതെ മാറിയിരിക്കുന്നു. പുതിയ കെട്ടിടങ്ങൾ തലയുയർത്തിയിട്ടുണ്ട്. മുൻപ് ഐഎസിന്റെ നിയന്ത്രത്തിലായിരുന്ന അൽ ഹാസക്കായിലേക്കുള്ള എം7 ഹൈവേ അടക്കം റോഡുകൾ സ്വതന്ത്രമാക്കപ്പെട്ടു. ജനങ്ങൾ ഇപ്പോഴും ഭീതിയുടെ പിടിയിലാണ്. നാളെയെന്ത് എന്ന അനിശ്ചിതത്വം. ബഷാർ അൽ അസദ് ഭരണകൂടം വീണെങ്കിലും തുർക്കി അതിർത്തിയോടു ചേർന്ന സിറിയയിലെ കുർദുമേഖലയായ റോജാവയ്ക്കു സ്വാതന്ത്ര്യം ഇനിയും അകലെ. ഐഎസിനെതിരായ യുദ്ധകാലത്തു നേടിയെടുത്ത റോജാവ ഓട്ടണമസ് അഡ്മിനിസ്ട്രേഷൻ എന്ന പേരിലുള്ള പരിമിത സ്വയംഭരണമടക്കം നഷ്ടമാകുമോ എന്ന ഭീതി കുർദുകൾക്കുണ്ട്. നാലുചുറ്റും ശത്രുക്കളോടു പൊരുതുകയാണു കുർദുകൾ – തുർക്കിയുടെ പിന്തുണയുള്ള ഫ്രീ സിറിയൻ ആർമി എന്ന എസ്എൻഎ ഒരു വശത്ത്. ഐഎസ് പോലെയുള്ള ഭീകരസംഘടനകൾ മറ്റൊരു വശത്ത്.