ബഹുമാനത്തിന് മുന്നിൽ ആഘോഷം വഴിമാറി; തുടർച്ചയായി ‘സ്വർണ മുട്ടയിട്ട്’ ദുബെ; ഒന്നാം സ്ഥാനം നഷ്ടപ്പെട്ട് സഞ്ജു

‘വിക്കറ്റ് നേട്ടം ആഘോഷമാക്കാതിരുന്നത് അദ്ദേഹത്തോടുള്ള കടുത്ത ബഹുമാനം കാരണമാണ്’. ഡെത്ത് ഓവറുകളിലെ ചെന്നൈയുടെ പഞ്ച് ഹിറ്റർ എം.എസ്. ധോണിയെ ഗോൾഡൻ ‍ഡക്ക് ആക്കിയിട്ടുപോലും ആ സന്ദർഭം വലിയ ആഘോഷത്തിലേക്ക് എത്തിക്കാതിരുന്നതിനെപ്പറ്റി പഞ്ചാബ് ബോളർ ഹർഷൽ പട്ടേൽ പറഞ്ഞ വാക്കുകളാണിത്. ഐപിഎൽ 17–ാം സീസണിൽ ചെന്നൈ സൂപ്പർ കിങ്സ് 11 മത്സരങ്ങൾ പൂർത്തിയാക്കിയപ്പോൾ അതിൽ എം.എസ്.ധോണി ബാറ്റിങ്ങിനിറങ്ങിയത് 9 എണ്ണത്തിലാണ്. ഇതിൽ പുറത്തായത് രണ്ടേ രണ്ട് തവണ മാത്രവും. ഈ രണ്ട് പുറത്താകലുകളും കഴിഞ്ഞ 2 മത്സരങ്ങളിലായിരുന്നു. അതായത് പഞ്ചാബ് കിങ്സിന് എതിരെ നടന്ന ഹോം, എവേ മത്സരങ്ങളിൽ. ബാറ്റുമായി കളത്തിലെത്തിയ മറ്റ് 7 മത്സരങ്ങളിലും ധോണിയുടെ വിക്കറ്റ് സ്വന്തമാക്കാൻ മറ്റൊരു ടീമിനും സാധിച്ചില്ല. കഴിഞ്ഞ 17 സീസണുകളിലും ഐപിഎലിന്റെ ഭാഗമായിരുന്ന ധോണിയുടെ ചരിത്രത്തിലെ ഏറ്റവും ഉയർന്ന സ്ട്രൈക് റേറ്റിലാണ് (224.49) അദ്ദേഹം ഈ സീസണിൽ മുന്നേറിക്കൊണ്ടിരിക്കുന്നത്. ഐപിഎലിൽ കരിയറിൽ ഇതുവരെയുള്ള 261 മത്സരങ്ങളിൽ നിന്ന് ധോണിയുടെ ആകെ സ്ട്രൈക് റേറ്റ് 137.06 ആണ്. ഐപിഎൽ ചരിത്രത്തിൽ ആദ്യമായി ഒരു താരം 150 ക്യാച്ചുകൾ പിന്നിട്ട പോരാട്ടം കൂടിയായിരുന്നു ധരംശാലയിലെ പഞ്ചാബ് കിങ്സ് – ചെന്നൈ സൂപ്പർ കിങ്സ് മത്സരം. എം.എസ് ധോണി എന്ന ‘തല’യുടെ ഈ നേട്ടത്തിൽ വിക്കറ്റ് കീപ്പറിന്റെ ഗ്ലൗസിന് പിന്തുണയുമായി സാധാരണ ഫീൽഡറിന്റെ മികവും ഉണ്ടായിരുന്നു. 146 ക്യാച്ചുകൾ കീപ്പർ എന്ന നിലയിൽ സ്വന്തമാക്കിയിട്ടുള്ള ധോണി മറ്റു ക്യാച്ചുകൾ ഫീൽഡർ എന്ന നിലയിലാണ് പോക്കറ്റിലാക്കിയത്.