മഞ്ഞക്കടലിന്റെ തിരയിളക്കത്തിൽ മനംനിറഞ്ഞ് സ്റ്റോറെ; ആവേശം കപ്പ് നിറയ്ക്കുമെന്ന ഉറപ്പോടെ ബ്ലാസ്റ്റേഴ്സിലേക്ക്

ആ നേരം മികേൽ സ്റ്റോറെ ജിമ്മിൽ വിയർപ്പൊഴുക്കുകയായിരുന്നു; കേരള ബ്ലാസ്റ്റേഴ്സ് എഫ്സിയിൽ നിന്നുള്ള ക്ഷണത്തിന്റെ വിവരമറിഞ്ഞ നേരത്ത്! ഇന്ത്യയിൽ നിന്നുള്ള വിളിയെക്കുറിച്ച് ഏജന്റ് അറിയിച്ചപ്പോൾ സ്റ്റോറെ പറഞ്ഞു: ഓകെ! ഏതാനും ദിവസങ്ങൾക്കു ശേഷം ബ്ലാസ്റ്റേഴ്സ് സ്പോർട്ടിങ് ഡയറക്ടർ കരോലിസ് സ്കിൻകിസുമായി വിഡിയോ കോളിൽ സുദീർഘ ചർച്ച. പിന്നാലെ, ലണ്ടനിൽ ടീം ഉടമകളുമായി അന്തിമ കൂടിക്കാഴ്ച. അതോടെ തീരുമാനം ഉറച്ചു: മികേൽ സ്റ്റോറെ കേരള ബ്ലാസ്റ്റേഴ്സിന്റെ പുതിയ കോച്ച്. ഇവാൻ വുക്കോമനോവിച്ച് പരിശീലക സ്ഥാനം ഒഴിഞ്ഞതിനു പിന്നാലെ, പുതിയ കോച്ചിനു വേണ്ടിയുള്ള അന്വേഷണം സ്റ്റോറെയിൽ എത്തിയ കഥ വെളിപ്പെടുത്തിയതു സ്റ്റോറെ തന്നെ.