‘എന്നെ കാത്തത് അന്നത്തെ തോൽവി; ദേശീയഗാനം കേൾക്കാൻ സർവതും മറന്നോടി; മകനെയോർത്ത് ഉറങ്ങാത്ത രാത്രി'

‘പയ്യോളി എക്സ്പ്രസ്’ എന്നു കേൾക്കുമ്പോൾ തീവണ്ടി വേഗത്തിൽ പി.ട‌ി.ഉഷ എന്ന പേര് ഇന്ത്യൻ കായികപ്രേമികളുടെ മനസ്സിലേക്കു കുതിച്ചെത്തും. കോഴിക്കോട് പയ്യോളിയിലെ കടപ്പുറത്ത് ഓട‌ിത്തുടങ്ങിയപ്പോൾ മുതൽ ലൊസാഞ്ചലസിലെ ഒളിംപിക്സ് ട്രാക്കിൽ കുതിച്ചോടുമ്പോൾ വരെ ഉഷയ്ക്കു മുന്നിലുണ്ടായിരുന്നത് ഒറ്റലക്ഷ്യം– രാജ്യത്തിനായി ഒരു മെഡൽ! സെക്കൻഡിന്റെ നൂറിലൊരംശം വ്യത്യാസത്തിൽ നഷ്ടപ്പെട്ട ആ മെഡൽ ഇന്നും ഇന്ത്യൻ കായിക ലോകത്തിന്റെ നെഞ്ചിലെ തീരാവേദനയാണ്. പിന്നീട് പല രാത്രികളിലും ആ സ്വപ്നനഷ്ടം ഓർത്ത് ഞെട്ടിയുണർന്ന് കരഞ്ഞതായി ഉഷ തന്നെ പറഞ്ഞിട്ടുണ്ട്. പക്ഷേ, പിന്നീട് ഉഷയുടെ ജീവിതത്തെയാകെ പരുവപ്പെടുത്തിയതും കിട്ടാതെ പോയ ആ മെഡലായിരുന്നു. രാജ്യസഭാംഗമായും ഇന്ത്യൻ ഒളിംപിക് അസോസിയേഷൻ പ്രസിഡന്റായും കായികരംഗത്ത് ഇപ്പോഴും ഓട്ടം തുടരുന്ന ഉഷയ്ക്ക് അറുപത് തികയുകയാണ്. കായികരംഗത്തെ കൂടുതൽ ജീവസ്സുറ്റതാക്കുന്ന പദ്ധതികളുമായി ഇനിയും കുതിപ്പ് തുടരാനുള്ള ശ്രമത്തിലാണ് പി.ടി.ഉഷ. ഉഷയോട് വിവിധ മേഖലകളിലെ പ്രതിഭകൾക്ക് എന്തൊക്കെയാവും ചോദിക്കാൻ ഉണ്ടാവുക? 60–ാം ജന്മദിനത്തിൽ ‘ചോദ്യങ്ങളുടെ ഉച്ചകോടി’ക്കു മറുപടി പറയുന്നു. ഉഷയ്ക്ക് ജന്മദിനാശംസകളും ഒപ്പം ചോദ്യങ്ങളുമായി വിവിധ മേഖലകളിലെ പ്രതിഭകൾ...