സ്നേഹബന്ധങ്ങളുടെ ട്രാക്കിൽ കയ്പും മധുരവും മാറിമാറി നുണഞ്ഞ വേഗറാണി; തീക്കടൽ കടന്ന കുതിപ്പിൽ ലോക ചാംപ്യനും അടിപതറി

ദുരിതത്തിന്റെ കടമ്പകൾ കടന്നാണു പലപ്പോഴും ഓരോ അത്‌ലീറ്റിന്റെയും വരവ്. ദുസ്സഹ ജീവിതത്തിന്റെ കനൽപ്പാതകൾ താണ്ടിവരുന്നവർക്കു ട്രാക്കിലെ ചൂടും ചൂരുമൊന്നും ഒരിക്കലും തീക്കൊള്ളികൾ ആകാറില്ല. സുഖലോലുപതയുടെ പട്ടുമെത്തകളിൽ കിടന്നു ശീലമില്ലാത്തവർ, സഹനവും കഠിനാധ്വാനവും ആവശ്യപ്പെടുന്ന പരിശീലനമുറകളിൽ തളരാതിരിക്കുന്നതു സ്വാഭാവികം മാത്രം... കാൾ ലൂയിസ് മുതൽ ഉസൈൻ ബോൾട്ട് വരെ... മെർലിൻ ഓട്ടി മുതൽ ഷെല്ലി ആൻ ഫ്രേസർ വരെ... ഓരോ അത്‌ലീറ്റിന്റെയും ജീവിതം 100 മീറ്റർ പോലെ അത്ര വേഗത്തിൽ കണ്ടുപോകാവുന്ന രംഗമല്ല; മറിച്ച്, സമയമെടുത്തു വായിച്ചു തീർക്കേണ്ട ജീവചരിത്ര പുസ്തകങ്ങളാണ്. കേരളത്തിലേക്കെത്തിയാൽ പി.ടി.ഉഷയും ഷൈനി വി‍ൽസനും ഉൾപ്പെടുന്ന തലമുറ മുതൽ പി.യു.ചിത്രയും വൈ.മുഹമ്മദ് അനസുമൊക്കെ ഉൾപ്പെടുന്ന തലമുറയിൽ വരെ ഇത്തരം അതിജീവനത്തിന്റെ നേർസാക്ഷ്യങ്ങളുണ്ട്. ഓരോ ഓട്ടവും ഓരോ ജീവിതത്തിന്റെ തെളിമയുള്ള