മുതിര്‍ന്ന പൗരന്മാര്ക്ക് കൂടുതൽ പലിശയുള്ള സ്ഥിരനിക്ഷേപം ഇനി കുറച്ചു ദിവസം കൂടി
Mail This Article
മുതിര്‍ന്ന പൗരന്മാര്ക്ക് കൂടുതൽ പലിശ ലഭ്യമാക്കുന്നതിനായി ബാങ്കുകള്‍ അവതരിപ്പിച്ച പ്രത്യേക സ്ഥിര നിക്ഷേപ പദ്ധതിയിൽ ചേരാൻ ഇനി കുറച്ചു ദിവസം കൂടി. ഈ മാസം 30ന് പദ്ധതികള്‍ അവസാനിക്കും.
കോവിഡ്‌ പശ്ചാത്തലത്തില്‍ കഴിഞ്ഞ വര്‍ഷം മെയിലാണ്‌ മുതിര്‍ന്ന പൗരന്മാര്ക്ക് വേണ്ടി പ്രത്യേക സ്ഥിര നിക്ഷേപ പദ്ധതി ബാങ്കുകള്‍ അവതരിപ്പിച്ചത്. കുറച്ചു കാലയളവിലേക്കാണ്‌ ഈ നിക്ഷേപങ്ങള്‍ അവതരിപ്പിച്ചത്. സാധാരണ സ്ഥിര നിക്ഷേപങ്ങളിൽ മുതിര്‍ന്ന പൗരന്മാര്ക്ക് പലിശ നിരക്കില്‍ 50ബേസിസ്‌ പോയിന്റുകൾ അധികം നല്‍കും . എന്നാല്‍, ഈ പ്രത്യേക പദ്ധതിയിൽ ഇതിലും കൂടുതല്‍ പലിശ നിരക്കാണുള്ളത്. സ്റ്റേറ്റ്‌ ബാങ്ക്‌ ഓഫ്‌്‌ ഇന്ത്യ (എസ്‌ബിഐ), എച്ച്‌ഡിഎഫ്‌സി ബാങ്ക്‌, ഐസിഐസിഐ ബാങ്ക്‌, ബാങ്ക്‌ ഓഫ്‌ ബറോഡ, തുടങ്ങിയ ബാങ്കുകള്‍ മുതിര്‍ന്ന പൗരന്മാര്ക്ക് വേണ്ടി ഈ പ്രത്യേക പദ്ധതി ലഭ്യമാക്കുന്നുണ്ട്‌.
ഈ ബാങ്കുകളുടെ പദ്ധതി ജൂണ്‍ 30ന് അവസാനിക്കുമെന്നാണ്‌ വെബ്‌സൈറ്റുകളില്‍ നിന്നും ലഭ്യമാകുന്ന വിവരം. . സ്ഥിര നിക്ഷേപത്തില്‍ നിന്നും കൂടുതല്‍ പലിശ നിരക്ക്‌ ആഗ്രഹിക്കുന്ന മുതിര്‍ന്ന പരന്‍മാര്‍ക്ക്‌ ഈ മാസം അവസാനം വരെ പദ്ധതിയുടെ ഭാഗാമാകാന്‍ അവസരം ലഭിക്കും. ഈ പദ്ധതി മാര്‍ച്ച്‌ 31 ന് അവസാനിക്കും എന്നാണ്‌ ആദ്യം ബാങ്കുകള്‍ അറിയിച്ചിരുന്നത്‌. എന്നാല്‍ പിന്നീടിത്‌ ജൂണ്‍ 30 വരെ നീട്ടുകയായിരുന്നു.
∙മുതിര്‍ന്ന പൗരന്‍മാര്‍ക്കായുള്ള എസ്‌ബിഐയുടെ പ്രത്യേക എഫ്‌ഡി സ്‌കീമാണ്‌ വികെയര്‍ ഡെപ്പോസിറ്റ്‌. 5 വര്‍ഷത്തില്‍ കൂടുതല്‍ കാലാവധിയുള്ള എഫ്‌ഡിയ്‌ക്ക്‌ 6.20 ശതമാനം പലിശ നിരക്കാണ്‌ സ്‌കീം ലഭ്യമാക്കുന്നത്. സാധാരണ എഫ്‌ഡി സ്‌കീമിനെ അപേക്ഷിച്ച്‌ 80 ബേസിസ്‌ പോയിന്റ്‌ അധികമാണിത്‌.
∙മുതിര്‍ന്ന പൗരന്‍മാര്‍ക്കായി എച്ച്‌ഡിഎഫ്‌സി ബാങ്ക്‌ ലഭ്യമാക്കുന്ന പ്രത്യേക എഫ്‌ഡി സ്‌കീമായ സീനിയര്‍ സിറ്റിസണ്‍ കെയര്‍ എഫ്‌ഡി ലഭ്യമാക്കുന്നത് 6.25 ശതമാനം പലിശ നിരക്കാണ്‌, 75 ബേസിസ്‌ പോയിന്റ്‌സ്‌ അധികമാണിത്‌.
∙മുതിര്‍ന്ന പൗരന്‍മാര്‍ക്കായുള്ള ഐസിഐസിഐ ബാങ്കിന്റെ പ്രത്യേക എഫ്‌ഡിസ്‌കീമായ ഐസിഐസിഐ ഗോള്‍ഡന്‍ ഇയേഴ്‌സ്‌ എഫ്‌ഡി സ്‌കീമില്‍ 6.30 ശതമാനം പലിശ നിരക്ക്‌ ലഭ്യമാകും.80 ബേസിസ്‌ പോയിന്റാണ്‌ കൂടുതല്‍ ലഭ്യമാക്കുന്നത്.
∙ബാങ്ക്‌ ഓഫ്‌ ബറോഡ ലഭ്യമാക്കുന്നത് 6.25 ശതമാനം പലിശ നിരക്കാണ്‌. 100 ബേസിസ്‌ പോയിന്റ്‌സ്‌ കൂടുതലാണിത്‌. ഈ നിരക്കുകള്‍ 2021 നവംബര്‍ 16 മുതല്‍ പ്രാബല്യത്തില്‍ വന്നു.
English Summary: Last Date for Senior Citizen's Special FD will be upto June 30