ജിഎസ്ടി നിയമലംഘനങ്ങൾ ക്രിമിനൽ കുറ്റമാക്കൽ പരിധി 3 കോടിക്ക് മുകളിലാക്കും

ന്യൂഡൽഹി∙ 3 കോടി രൂപയ്ക്ക് താഴെയുള്ള ജിഎസ്ടി നിയമലംഘനങ്ങൾ ക്രിമിനൽ കുറ്റമല്ലാതാക്കി മാറ്റിയേക്കും. നിലവിൽ 2 കോടിക്ക് മുകളിലുള്ള ജിഎസ്ടി നിയമലംഘനങ്ങൾക്കാണ് അറസ്റ്റ് അടക്കമുള്ള ക്രിമിനൽ നടപടിക്രമങ്ങൾ ബാധകം. ഈ പരിധി 5 കോടിയാക്കി ഉയർത്തണമെന്നായിരുന്നു വ്യാപാരികളുടെ ആവശ്യം.

ചെറുകിട വ്യാപാരികൾക്കും ബിസിനസുകൾക്കും പിന്തുണ നൽകുന്നതിന്റെ ഭാഗമായാണ് കഴിഞ്ഞ ഡിസംബറിൽ ജിഎസ്ടി കൗൺസിൽ 2 കോടി വരെയുള്ള ലംഘനങ്ങൾ ക്രിമിനൽ കുറ്റത്തിന്റെ പരിധിയിൽ നിന്ന് ഒഴിവാക്കിയത്. അതുവരെ 1 കോടി രൂപയായിരുന്നു പരിധി. ഈ പരിധിയാണ് വീണ്ടും ഉയർത്താൻ ആലോചിക്കുന്നത്. വരുന്ന ജിഎസ്ടി കൗൺസിലിൽ ചർച്ച ചെയ്തേക്കുമെന്നാണ് സൂചന.

വ്യാജ ഇൻവോയ്സ് തയാറാക്കുന്നത് ഒഴികെയുള്ള കുറ്റങ്ങൾക്ക് മാത്രമാണ് ഡിസംബറിൽ 2 കോടിയായി പരിധി വർധിപ്പിച്ചത്. 1 കോടി രൂപയ്ക്കു മുകളിലുള്ള വ്യാജ ഇൻവോയ്സിങ് കേസിന് അറസ്റ്റ് ചെയ്യാമെന്ന വ്യവസ്ഥ നിലനിർത്തിയിട്ടുണ്ട്.