പ്രവാസികൾ ഓഹരി വിപണിയുടെ നേട്ടമെടുക്കാനെന്തു ചെയ്യണം?

കഴിഞ്ഞ രണ്ടു വർഷത്തെ കണക്കുകളെടുത്താൽ  റെക്കോർഡുകൾ ഭേദിച്ച് ഇന്ത്യൻ ഓഹരി വിപണി മുന്നേറുകയാണ്. എന്നാൽ വിദേശ ഇന്ത്യക്കാർക്ക് പലർക്കും വിപണിയുടെ നേട്ടങ്ങളിൽ നേരിട്ട് പങ്കെടുക്കാനാകുന്നില്ലെന്ന പരാതിയുണ്ട്.

കാരണം

ഇന്ത്യയിൽ ഡീമാറ്റ് അക്കൗണ്ട് തുറക്കാൻ എൻ ആർ ഐകൾക്ക് ഇപ്പോഴും പല  പ്രശ്‍നങ്ങളും നേരിടുന്നുണ്ടെന്നാണ് പരാതി. നേരിട്ട് അക്കൗണ്ട് തുറന്ന് സാധാരണ ഇന്ത്യക്കാരുടെ പോലെ വ്യാപാരം ചെയ്യാനായാൽ കൂടുതൽ പ്രവാസികൾ ഇന്ത്യൻ ഓഹരി വിപണിയിൽ കൂടുതൽ നിക്ഷേപിക്കാൻ തയ്യാറാണ്. എന്നാൽ നേരിട്ട് ഡീമാറ്റ് അക്കൗണ്ട് തുറക്കുന്നതിനു പല നൂലാമാലകളിലൂടെയും വിദേശ ഇന്ത്യക്കാർ കടന്നു പോകണം. എട്ട് തരം രേഖകൾ സമർപ്പിച്ചാൽ മാത്രമേ വിദേശ ഇന്ത്യക്കാർക്ക് എൻ ആർ ഐ ഡീമാറ്റ് അക്കൗണ്ട് തുറക്കാൻ സാധിക്കുകയുള്ളൂ.

ഡീമാറ്റ് അക്കൗണ്ടിന് ഏതൊക്കെ രേഖകൾ ?

∙ഒരു പെർമനന്റ് അക്കൗണ്ട് നമ്പർ (പാൻ) കാർഡ് എന്നത് ഓരോ വ്യക്തിക്കും തനതായ 10 അക്ക ആൽഫാന്യൂമെറിക് കോഡാണ്. ആദായനികുതി  ഡിപ്പാർട്ട്‌മെന്റ് നൽകുന്ന ഇത്  പല സാമ്പത്തിക ഇടപാടുകൾക്കും ആവശ്യമാണ്.  

∙നിങ്ങൾ ഒരു NRI ആണെങ്കിൽ, നിങ്ങളുടെ വിലാസത്തിന്റെയും വിസ പേജുകളുടെയും പകർപ്പുകൾക്കൊപ്പം പാസ്‌പോർട്ടിന്റെ ഒരു പകർപ്പ് സമർപ്പിക്കണം . ഒരു വിദേശ രാജ്യത്ത് നിങ്ങൾ താമസിക്കുന്നതിന്റെ തെളിവാണ്  ഇത്. വ്യക്തി അവരുടെ NRI സ്റ്റാറ്റസിനെക്കുറിച്ച് കള്ളം പറയുന്നില്ലെന്ന് ഉറപ്പാക്കാൻ ഇത് ആവശ്യമാണ്.

∙OCI അല്ലെങ്കിൽ POI കാർഡുകളുടെ ഒരു പകർപ്പ് സമർപ്പിക്കണം.  ഇന്ത്യൻ പൗരനായിരുന്നുവെന്ന് ഈ കാർഡുകൾ തെളിയിക്കുന്നു.

∙വിദേശ രാജ്യത്ത് താമസിക്കുമ്പോൾ, നിങ്ങൾ വിദേശ വിലാസ തെളിവിന്റെ പകർപ്പ് സമർപ്പിക്കണം .

∙ഇന്ത്യൻ വിലാസം തെളിയിക്കാനായി നിങ്ങളുടെ ആധാർ കാർഡ്, പാസ്‌പോർട്ട്, വോട്ടർ ഐഡി എന്നിവയും സമർപ്പിക്കണം.

∙NRO അല്ലെങ്കിൽ NRE അക്കൗണ്ട് ഉണ്ടെങ്കിൽ റദ്ദാക്കിയ ചെക്കിന്റെ ഒരു പകർപ്പ് സമർപ്പിക്കണം. നിങ്ങളുടെ അക്കൗണ്ട് നമ്പർ, ബാങ്കിന്റെ IFSC കോഡ്, അക്കൗണ്ടിന്റെ മറ്റ് വിശദാംശങ്ങൾ എന്നിവയുടെ തെളിവിനായാണ് ഇത്.  

∙നിങ്ങൾ NRE അല്ലെങ്കിൽ NRO അക്കൗണ്ട് തുറന്നിട്ടുള്ള ഒരു ഇന്ത്യൻ ബാങ്ക് നൽകുന്ന ഒരു പോർട്ട്‌ഫോളിയോ ഇൻവെസ്റ്റ്‌മെന്റ് സ്കീം ലെറ്ററാണ് PIS. ഇതിന്റെ ഒരു പകർപ്പും സമർപ്പിക്കണം.

∙നിങ്ങളുടെ ഐഡന്റിറ്റി തെളിയിക്കുന്ന പാസ്‌പോർട്ട് സൈസ് ഫോട്ടോഗ്രാഫുകൾ സമർപ്പിക്കണം .

എങ്ങനെ ഡീമാറ്റ് അക്കൗണ്ട് തുറക്കാം?

ഇതിനായി ഒരു എൻ ആർ ഇ അല്ലെങ്കിൽ ഒരു എൻ ആർ ഓ അക്കൗണ്ട് വേണം. തുടർന്ന് പോർട്ടഫോളിയോ ഇൻവെസ്റ്റ്മെന്റ്റ് സ്‌കീം(PIS )രേഖകൾ സമർപ്പിക്കണം. അതിനായുള്ള രേഖകൾ  നിങ്ങളുടെ ബാങ്കിലേക്ക് വിദേശത്തു നിന്ന് കൊറിയർ ചെയ്യണം. അല്ലെങ്കിൽ നാട്ടിൽ വരുമ്പോൾ അക്കൗണ്ട് തുടങ്ങാം. എൻ ആർ ഇ, എൻ ആർ ഒ അക്കൗണ്ടുകളിലും പി ഐ എസ് സ്‌കീം വഴി ഓഹരി വിപണിയിൽ നിക്ഷേപം നടത്താം. ബ്രോക്കറേജുകൾ നിക്ഷേപം നടത്തുന്നതിന് നോൺ പി ഐ എസ് സ്‌കീമും നൽകുന്നുണ്ട്. സിറോദ പോലുള്ള ബ്രോക്കറേജുകളിൽ നോൺ പി ഐ എസ് അക്കൗണ്ട്ഉള്ളവരാണ് കൂടുതൽ.

എൻ ആർ ഐകൾക്ക്  ഇൻട്രാ ഡേ ചെയ്യാനാകുമോ?

എൻആർഐകൾക്ക് ഇന്ത്യൻ ഇക്വിറ്റികളിൽ ഡെലിവറി അടിസ്ഥാനത്തിൽ മാത്രമേ വ്യാപാരം ചെയ്യാൻ  ചെയ്യാൻ കഴിയൂ. അതിനാൽ, ഇൻട്രാഡേ ട്രേഡിങ് , ബിടിഎസ്ടി ട്രേഡിങ്, എസ്ടിബിടി ട്രേഡിങ് കൂടാതെ ഷോർട്ട് സെല്ലിങ് എന്നിവയൊന്നും  എൻആർഐകൾക്ക് ചെയ്യാൻ സാധിക്കില്ല. നിലവിൽ, എൻആർഐകൾക്ക് ഇന്ത്യൻ ഇക്വിറ്റികളിലും എഫ് ആൻഡ് ഒയിലും വ്യാപാരം നടത്താൻ അനുമതിയുണ്ടെങ്കിലും കറൻസി ഡെറിവേറ്റീവുകളിലും ചരക്കുകളിലും വ്യാപാരം ചെയ്യുന്നതിന് അനുവാദമില്ല.

വ്യാപാരം  ചെയ്യുമ്പോൾ രാജ്യങ്ങളുടെ സമയമേഖലാ വ്യത്യാസങ്ങളും പലപ്പോഴും വിദേശ ഇന്ത്യക്കാർക്ക് ബുദ്ധിമുട്ടുണ്ടാക്കാറുണ്ട്. ഇതിനൊക്കെ പുറമെ ഇന്ത്യൻ  ഓഹരി വിപണിയെക്കുറിച്ച്   കൃത്യമായ അറിവ്,  തന്ത്രപരമായ മനോഭാവം എന്നിവ കൂടി ഉണ്ടായെങ്കിൽ മാത്രമേ  എൻആർഐകൾക്ക്  ഫലപ്രദമായി  ഇന്ത്യൻ വിപണിയുടെ വളർച്ചയിൽ നിന്ന് നേട്ടങ്ങൾ കൊയ്യാൻ സാധിക്കൂ.